KHamosh raat uski muntazir thi

ḳhāmosh raat us kī muntazir thī

vo ek martaba phir se

apnī mas.hūr kun shaḳhsiyat se

merī niiñd ko shikast dete hue

mere ḳhvāb kī dahlīz par

maazī kī yādoñ se mahaktā huā

bouquet thāme khaḌā thā

maiñ dastak kī muntazir thī

vo dabe qadmoñ mere ḳhvāb kī adh-khilī khiḌkī se

andar dāḳhil huā aur ḳhāmoshī se mere pīchhe aan khaḌā huā

vo ḳhāmoshī bilkul aisī thī ki

jaise sahrā meñ koī zaḳhmī udaas panchhī

kisī dev kī qaid meñ muntazir ho

kisī masīhā kī masīhā.ī kā

aur vo masīhā ḳhud kisī masīhā ke intizār meñ

sham.a jalā.e kisī kī chaukhaT par baiThā ho

vo uñgliyoñ kī poroñ meñ cigarette thāme khaḌā thā

vo lambe lambe kash le rahā thā

phir vo thak gayā

jaise lambī masāfat ke baad

koī musāfir kisī kārvāñ sarā.e meñ jā baiThe

aur yak-dam apnī manzil kā tasavvur aate hī

is be-vaj.h thakān ko alvidā.a kah de

us ne apne hāthoñ ko ek baar phir se harakat dī

uñgliyoñ meñ dabe cigarette ko

hoñToñ ke qarīb le gayā

aur narmī se use chhuā

vo us kā āḳhirī kash thā

āḳhirī kash jaise āḳhirī vaar ho

laboñ par fātehāna muskurāhaT sajā.e us ne āḳhirī kash mukammal kiyā

phir zamīn pe pheñkā aur masal diyā

'vo' aur naarī ek sī ḳhusūsiyāt ke hāmil haiñ

jab tak sulgan baaqī rahe

hoñToñ ke qarīb raheñge

aur ThanDī hote hī apne anjām ko pahuñch jā.eñge

sard raat us kī tapish aur harārat ko bhī nigal chukī thī

vo bhī apne anjām kī āḳhirī sarhadoñ par thī

raat chhuTtī jā rahī thī

jaise us kī dīvāngī kī vahshat se Dare hue tāroñ ko

lorī sunāte sunāte us ne muqaddas chāñd ko alvidā.a kah diyā ho

aur maiñ apnī āñkhoñ meñ lā-hāsil kī tamanna sajā.e

jaise tez āñdhī meñ taak meñ paḌe hue diye ke gird hatheliyāñ jamā.e khaḌī thī

KHamosh raat us ki muntazir thi

wo ek martaba phir se

apni mashur kun shaKHsiyat se

meri nind ko shikast dete hue

mere KHwab ki dahliz par

mazi ki yaadon se mahakta hua

bouquet thame khaDa tha

main dastak ki muntazir thi

wo dabe qadmon mere KHwab ki adh-khili khiDki se

andar daKHil hua aur KHamoshi se mere pichhe aan khaDa hua

wo KHamoshi bilkul aisi thi ki

jaise sahra mein koi zaKHmi udas panchhi

kisi dew ki qaid mein muntazir ho

kisi masiha ki masihai ka

aur wo masiha KHud kisi masiha ke intizar mein

shama jalae kisi ki chaukhaT par baiTha ho

wo ungliyon ki poron mein cigarette thame khaDa tha

wo lambe lambe kash le raha tha

phir wo thak gaya

jaise lambi masafat ke baad

koi musafir kisi karwan sarae mein ja baiThe

aur yak-dam apni manzil ka tasawwur aate hi

is be-wajh thakan ko alwidaa kah de

us ne apne hathon ko ek bar phir se harakat di

ungliyon mein dabe cigarette ko

honTon ke qarib le gaya

aur narmi se use chhua

wo us ka aaKHiri kash tha

aaKHiri kash jaise aaKHiri war ho

labon par fatehana muskurahaT sajae us ne aaKHiri kash mukammal kiya

phir zamin pe phenka aur masal diya

'wo' aur nari ek si KHususiyat ke hamil hain

jab tak sulgan baqi rahe

honTon ke qarib rahenge

aur ThanDi hote hi apne anjam ko pahunch jaenge

sard raat us ki tapish aur hararat ko bhi nigal chuki thi

wo bhi apne anjam ki aaKHiri sarhadon par thi

raat chhuTti ja rahi thi

jaise us ki diwangi ki wahshat se Dare hue taron ko

lori sunate sunate us ne muqaddas chand ko alwidaa kah diya ho

aur main apni aankhon mein la-hasil ki tamanna sajae

jaise tez aandhi mein tak mein paDe hue diye ke gird hatheliyan jamae khaDi thi