خلا کی گود

عروس امن کے ہونٹوں پہ سہمی سہمی سی

مچل رہی ہے تبسم کی کہکشاں بن کر

یہ زندگی جو کہیں پھول ہے جوانی ہے

کسی حسیں کا تکلم کسی صنم کا جمال

کسی کی زلف کا بادل کسی نظر کا خمار

کسی دمکتی جبیں پر حیا کی سرخ لکیر

جھکی جھکی سی نگاہوں کا سحر ہوش ربا

یہ زندگی کہ جو تہذیب آدمیت کو

سجائے پلکوں پہ کاجل کی طرح نازاں ہے

یہ زندگی جو تمدن کو اپنے سینے سے

لگائے رقص کناں ہے سحر کی راہوں میں

یہ زندگی کہ جو انسانیت کے پیکر میں

خلا کی گود میں فطرت سے ہم کلام ہوئی

یہ کائنات کے بربط پہ دل نشیں اک راگ

زمیں کی مانگ کا سیندور آسماں کا سہاگ

جلو میں قافلۂ رنگ و نور لائی ہے

عروس امن کی آغوش میں در آئی ہے