khilaune

(tīsrī duniyā ke tamām logoñ ke naam)

ajab hādsa hai

ki bachpan meñ ham jin khilaunoñ se khele the

ab vo khilaune

hamāre hī hālāt se khelte haiñ

vo nāzuk mujassame

vo rañgīn guḌiyā.eñ

tayyāre pistol

faujī sipāhī

kabhī jo hamāre ishāroñ ke mohtāj the

āfrīñ tujh pe meyār-e-gardish

ki ab vo khilaune

hameñ chābiyāñ bhar rahe haiñ

hamāre maveshī hamāre hī bāġhāt ko char rahe haiñ

khilaunoñ ke is khel meñ

ham to yuuñ kho ga.e haiñ

ki har kaam kī ham se ummīd rakh lo

agar koī taqve kī chābī ghumā de

to dāḌhī baḌhā leñ

agar koī thoḌī sī qīmat lagā kar

kisī shaḳhs kā ghar batā de

to agle hī pal meñ us kī gardan uḌā deñ

hamārā hai kyā

ham to andhe muazzin haiñ

baazū pakaḌ ke jo garje meñ le jāoge

to bhī maryam kī tasvīr ke sāmne

uñgliyāñ kaan meñ Thūñs leñge

hamārā hai kyā

ham to patthar kī vo mūrtī haiñ

jise chāhe sajda karo

yā tamāchā lagā do

magar vo to hāthoñ se chhātī chhupā.e

sadā muskurātī rahegī

(tisri duniya ke tamam logon ke nam)

ajab hadsa hai

ki bachpan mein hum jin khilaunon se khele the

ab wo khilaune

hamare hi haalat se khelte hain

wo nazuk mujassame

wo rangin guDiyaen

tayyare pistol

fauji sipahi

kabhi jo hamare ishaaron ke mohtaj the

aafrin tujh pe meyar-e-gardish

ki ab wo khilaune

hamein chabiyan bhar rahe hain

hamare maweshi hamare hi baghat ko char rahe hain

khilaunon ke is khel mein

hum to yun kho gae hain

ki har kaam ki hum se ummid rakh lo

agar koi taqwe ki chabi ghuma de

to daDhi baDha len

agar koi thoDi si qimat laga kar

kisi shaKHs ka ghar bata de

to agle hi pal mein us ki gardan uDa den

hamara hai kya

hum to andhe muazzin hain

bazu pakaD ke jo garje mein le jaoge

to bhi maryam ki taswir ke samne

ungliyan kan mein Thuns lenge

hamara hai kya

hum to patthar ki wo murti hain

jise chahe sajda karo

ya tamacha laga do

magar wo to hathon se chhati chhupae

sada muskuraati rahegi