KHizan mausam nahin hai

ḳhizāñ mausam nahīñ hai

ek lamha hai ki jis kī aarzū meñ

sabz patte

havā kī āhaToñ par kaan dharte haiñ

guzarte vaqt meñ sā.at-ba-sā.at

na.e pairāhanoñ meñ

gulābī aur gahre surḳh unnābī

dahakte ḳhushnumā rañgoñ se le kar zard hone tak

kabhī dhīme kabhī ūñche suroñ meñ baat kartī

ḳhushbuoñ meñ bas-basā kar

havā ke saath mahv-e-raqs honā chāhte haiñ

zamīñ kā rizq ban jaane se pahle

vahī ik ajnabī vāraftagī aur raqs kā lamha

kahīñ par daur-e-ā.inda ke mausam kī samā.at meñ

kisī so.e hue ik biij meñ

ḳhvāhish numū kī sar uThātī hai

bahut hī pyaar se har shāḳh ke patte se kahtī hai

ki ab rizq-e-zamīñ ban kar

kisī ik narm koñpal kī numū kā aasrā ban jā

ḳhizāñ mausam nahīñ hai

ik masarrat-ḳhez taḳhlīq-e-amal kā aasrā hai

KHizan mausam nahin hai

ek lamha hai ki jis ki aarzu mein

sabz patte

hawa ki aahaTon par kan dharte hain

guzarte waqt mein saat-ba-saat

nae pairahanon mein

gulabi aur gahre surKH unnabi

dahakte KHushnuma rangon se le kar zard hone tak

kabhi dhime kabhi unche suron mein baat karti

KHushbuon mein bas-basa kar

hawa ke sath mahw-e-raqs hona chahte hain

zamin ka rizq ban jaane se pahle

wahi ek ajnabi waraftagi aur raqs ka lamha

kahin par daur-e-ainda ke mausam ki samaat mein

kisi soe hue ek bij mein

KHwahish numu ki sar uThati hai

bahut hi pyar se har shaKH ke patte se kahti hai

ki ab rizq-e-zamin ban kar

kisi ek narm konpal ki numu ka aasra ban ja

KHizan mausam nahin hai

ek masarrat-KHez taKHliq-e-amal ka aasra hai