KHuda se kalam

ḳhudā-e-bartar

terī vahdāniyat kī qasam

jab bhī tere aage sar-ba-sujūd huī

to niyyat kī

ki zamīn ke un tamām ḳhudāoñ ko radd kartī huuñ

jo apne ohdoñ ke aage

mujhe jhukāne par ba-zid rahe

ai hamesha rahne vaalī zaat

jab koī jism-e-ḳhākī tāqat ke nashe meñ

kisī kamzor ko kuchaltā hai

tab guzartā vaqt is par bahut hañstā hai

ai rāziq-e-rahīm

ham aise nizām ko bhog rahe haiñ

jahāñ ek kī baqā dūsre kī bhuuk par qābiz hone meñ hai

tū ki vāqif hai diloñ ke bhed se

aise hālāt aa jaate haiñ ki

sach gosha-nashīn ho jaatā hai

sharāfat aur hayā pe

sañg-bārī hotī hai

ai ḳhāliq-e-kā.enāt

tū ne apne kalām meñ zamīn kā dukh bayān kiyā hai

jo an-ginat mazālim apne uupar jheltī hai

is zamīn kī ḳhāmoshī kī qasam

saare zālim apnī dasht apnī saffākiyoñ kā khel rachāte rachāte

ek din zamīn ke andar chale jaate haiñ

ai ḳhudā-e-azīm

ye zamīn merā bichhaunā

maiñ ne us kī ḳhāmushī ko apne siine meñ utārā

tere atā kiye hue hausle ne

mere qadam ukhaḌne nahīñ diye

varna

kisī drill-machine kī tarah

jumle dil meñ sūrāḳh karte ga.e

tashannuj-zada chehroñ par hañsī tab dikhā.ī dī

jab āñkhoñ se ḳhvāb chhīn liye ga.e

ai mere parvardigār

hameñ ek aisā muāshra diyā gayā

jahāñ hamāre phepḌoñ pe paañv rakh ke hukmarānī karne vaale

hamārī saañs ke chalne rukne kā tamāshā dekhte haiñ

tashāma-bīnoñ kī āñkhoñ us ant kī muntazir hotī haiñ

ki jab in se zinda rahne kī bhiik māñgī jaa.e

ai mere ma.abūd

maiñ ne aise hī kagār pe

terī bartarī talab kī

ai mere dukhoñ ke rāz-dāñ

tū vāqif hai

jab mere ird-gird girya-e-vahshat taarī thā

aur mujhe batāyā jā rahā thā

ki sartān mere baap ko khā rahā hai

vo vaqt thā ki na koī harf-e-tasallī kaam aa saktā thā na koī ummīd baaqī rah ga.ī thī

merī āñkheñ ḳhushk thiiñ

mere saare aañsū mere andar girte ga.e

vo vaqt thā mere ma.abūd

jab tū ne mere qalb ko ġham se labrez kar ke

merī tarbiyat kī thī

mujhe bāvar huā

ki aane vaale vaqt meñ qadam qadam pe

mujhe sartān kā sāmān karnā hogā

fiqroñ meñ qahqahoñ meñ

us shaitān ko kañkarī kaun maare

jo tārīk diloñ ke minā meñ baiThā hai

mere maulā

maiñ kisī mo.ajize kī muntazir nahīñ

bas itnī himmat de mujhe

ki tīrgī ke muqābil

raushnī ko hameshgī de duuñ

KHuda-e-bartar

teri wahdaniyat ki qasam

jab bhi tere aage sar-ba-sujud hui

to niyyat ki

ki zamin ke un tamam KHudaon ko radd karti hun

jo apne ohdon ke aage

mujhe jhukane par ba-zid rahe

ai hamesha rahne wali zat

jab koi jism-e-KHaki taqat ke nashe mein

kisi kamzor ko kuchalta hai

tab guzarta waqt is par bahut hansta hai

ai raaziq-e-rahim

hum aise nizam ko bhog rahe hain

jahan ek ki baqa dusre ki bhuk par qabiz hone mein hai

tu ki waqif hai dilon ke bhed se

aise haalat aa jate hain ki

sach gosha-nashin ho jata hai

sharafat aur haya pe

sang-bari hoti hai

ai KHaliq-e-kaenat

tu ne apne kalam mein zamin ka dukh bayan kiya hai

jo an-ginat mazalim apne upar jhelti hai

is zamin ki KHamoshi ki qasam

sare zalim apni dasht apni saffakiyon ka khel rachate rachate

ek din zamin ke andar chale jate hain

ai KHuda-e-azim

ye zamin mera bichhauna

main ne us ki KHamushi ko apne sine mein utara

tere ata kiye hue hausle ne

mere qadam ukhaDne nahin diye

warna

kisi drill-machine ki tarah

jumle dil mein suraKH karte gae

tashannuj-zada chehron par hansi tab dikhai di

jab aankhon se KHwab chhin liye gae

ai mere parwardigar

hamein ek aisa muashra diya gaya

jahan hamare phepDon pe panw rakh ke hukmarani karne wale

hamari sans ke chalne rukne ka tamasha dekhte hain

tashama-binon ki aankhon us ant ki muntazir hoti hain

ki jab in se zinda rahne ki bhik mangi jae

ai mere mabud

main ne aise hi kagar pe

teri bartari talab ki

ai mere dukhon ke raaz-dan

tu waqif hai

jab mere ird-gird girya-e-wahshat tari tha

aur mujhe bataya ja raha tha

ki sartan mere bap ko kha raha hai

wo waqt tha ki na koi harf-e-tasalli kaam aa sakta tha na koi ummid baqi rah gai thi

meri aankhen KHushk thin

mere sare aansu mere andar girte gae

wo waqt tha mere mabud

jab tu ne mere qalb ko gham se labrez kar ke

meri tarbiyat ki thi

mujhe bawar hua

ki aane wale waqt mein qadam qadam pe

mujhe sartan ka saman karna hoga

fiqron mein qahqahon mein

us shaitan ko kankari kaun mare

jo tarik dilon ke mina mein baiTha hai

mere maula

main kisi moajize ki muntazir nahin

bas itni himmat de mujhe

ki tirgi ke muqabil

raushni ko hameshgi de dun