KHuddari

terā ye kahte hue siine meñ dil hiltā nahīñ

ham-nashīñ kyoñ ḳhud-parastāroñ se maiñ miltā nahīñ

pūchhtā hai mujh se is mohmal se fiqre kā javāb

sun kiye detā huuñ maiñ saarī haqīqat be-naqāb

sīna-e-shā.ir meñ pinhāñ jazba-e-ḳhuddār hai

aañkh bhī raushan hai merī ruuh bhī bedār hai

un ke aage ruuh merī pech-o-ḳham khātī rahī

phabtiyāñ kastā rahā dil ruuh sharmātī rahī

sard-mehrī se tamannā-e-dilī shal ho ga.ī

bār-e-ġham se ġhairat-e-taqdīr bojhal ho ga.ī

garmī-e-ḳhurshīd se sonā pighaltā hai kahīñ

jauharī bhī nuqs ke sāñche meñ Dhaltā hai kahīñ

jab ra.ūnat chheḌtī hai ḳhud-parastī kā sitār

bhes meñ aahoñ ke dil hotā hai merā naġhma-bār

qalb merā daulat-e-ehsās kho saktā nahīñ

āb-o-tāb-e-zar meñ ḳhuddārī Dubo saktā nahīñ

miT nahīñ saktā miTā.e se ġhayūrāna-shikoh

kyā banā saktā hai aḳhlāqī darindoñ kā giroh

jazba-e-ġhairat kisī ke paañv paḌ saktā nahīñ

mar to saktā huuñ zamīñ meñ zinda gaḌ saktā nahīñ

rahzan-e-insāniyat rahte haiñ har dam ghaat meñ

apnī azmat kā koī rakhte haiñ pahlū baat meñ

ġhairat-e-muḳhlis halāk-e-jazba-e-pindār ho

ai harīf-e-zehn-o-dil bedār ho bedār ho

un kī behis khaal par koī asar hotā nahīñ

tang-nazroñ meñ haqīqat kā guzar hotā nahīñ

merī tārīḳh-o-adab hī meñ nahīñ alfāz-e-lāf

banda-parvar hai mujhe kam-mā.egī kā e'tirāf

aisī hālat meñ kisī se jhuk ke milnā hai gunāh

ye ḳhulūs-e-be-mahal kartā hai rūhoñ ko siyāh

apnā dil apne hī hāthoñ se masal saktā nahīñ

ham-nashīñ maiñ apnī fitrat ko badal saktā nahīñ

tera ye kahte hue sine mein dil hilta nahin

ham-nashin kyon KHud-parastaron se main milta nahin

puchhta hai mujh se is mohmal se fiqre ka jawab

sun kiye deta hun main sari haqiqat be-naqab

sina-e-shair mein pinhan jazba-e-KHuddar hai

aankh bhi raushan hai meri ruh bhi bedar hai

un ke aage ruh meri pech-o-KHam khati rahi

phabtiyan kasta raha dil ruh sharmati rahi

sard-mehri se tamanna-e-dili shal ho gai

bar-e-gham se ghairat-e-taqdir bojhal ho gai

garmi-e-KHurshid se sona pighalta hai kahin

jauhari bhi nuqs ke sanche mein Dhalta hai kahin

jab raunat chheDti hai KHud-parasti ka sitar

bhes mein aahon ke dil hota hai mera naghma-bar

qalb mera daulat-e-ehsas kho sakta nahin

aab-o-tab-e-zar mein KHuddari Dubo sakta nahin

miT nahin sakta miTae se ghayurana-shikoh

kya bana sakta hai aKHlaqi darindon ka giroh

jazba-e-ghairat kisi ke panw paD sakta nahin

mar to sakta hun zamin mein zinda gaD sakta nahin

rahzan-e-insaniyat rahte hain har dam ghat mein

apni azmat ka koi rakhte hain pahlu baat mein

ghairat-e-muKHlis halak-e-jazba-e-pindar ho

ai harif-e-zehn-o-dil bedar ho bedar ho

un ki behis khaal par koi asar hota nahin

tang-nazron mein haqiqat ka guzar hota nahin

meri tariKH-o-adab hi mein nahin alfaz-e-laf

banda-parwar hai mujhe kam-maegi ka e'tiraf

aisi haalat mein kisi se jhuk ke milna hai gunah

ye KHulus-e-be-mahal karta hai ruhon ko siyah

apna dil apne hi hathon se masal sakta nahin

ham-nashin main apni fitrat ko badal sakta nahin