خوشبو

ترے لمس دست حسیں کی

دل آویز خوشبو

تری انگلیوں سے

مری انگلیوں میں گزرتی ہوئی جب

ہتھیلی میں اتری تو میں نے

اسے دست تشنہ

میں کچھ اس طرح سے سمیٹا

کہ محفوظ کر لوں گا شاید ابد تک

میں اپنے لیے صرف اپنے لیے

تیرا حسن شگفتہ جمال درخشاں

گماں سے حسیں خواب تک میں

نے محسوس تجھ کو کیا پاؤں سے سر تلک ہو گیا میں منور

کف آرزو کھولتا ہوں

تجھے آج آزاد کرتا ہوں بوئے فروزاں

ہواؤں میں نیلی فضاؤں میں اڑتی پھرو آسمانوں کو چھو لو

ستاروں پہ اترو

عناصر کو باہوں میں لے لو

کہ خوشبو ہو تم رنگ ہو روشنی ہو

سر موسم گل

سنورتی ہوئی کیف جشن ادا میں

نئی زندگی ہو