kirae ka makan

ajab shai hai kirā.e kā makāñ bhī

makāñ bhī hai ye zālim lā-makāñ bhī

baḌī ujlat meñ banvāyā gayā hai

la.ī se chhat ko chipkāyā gayā hai

hai vaaq.e ek naalī ke kināre

mayassar haiñ mujhe kyā kyā nazāre

nazīr un kī jahān-e-ḳhvāb meñ hai

bahārāñ kī shab-e-mahtāb meñ hai

na kyoñ ho jism merā ranj se chuur

faqat do miil hai ye shahr se duur

yahāñ āb-o-havā kā masḳh chehra

milā hargiz na mauqa dekhne kā

ham aapas meñ bahut ghul-mil ga.e haiñ

mujhe jeboñ meñ chamgādaḌ mile haiñ

haiñ bām-o-dar pe ye ġhārat-gar-e-hosh

bahār-e-bistar-o-nau-roz-e-āġhosh

hamārī ab ye hālat ho ga.ī hai

añdheroñ se mohabbat ho ga.ī hai

yahāñ din ko bhī ullū bolte haiñ

mire kānoñ meñ amras gholte haiñ

jo duniyā meñ haiñ ye kīḌe-makoḌe

yahīñ pal kar javāñ hote haiñ saare

ġhubār-ālūd yuuñ merī jabīñ hai

kahīñ sīḌhī kahīñ kuchh bhī nahīñ hai

isī sīḌhī kā hai vo vāqi.a bhī

luḌhak kar mar ga.ī jo saas merī

yahāñ chūhoñ ke bil itne baḌe haiñ

ka.ī sābit qadam in meñ gire haiñ

mujhe bhī duur kī ik roz sūjhī

kisī bil ko maiñ khodūñ jī meñ aa.ī

jo khodā chashm-e-hairāñ ne ye dekhā

ki ik leader numā moTā sā chūhā

dabā.e muñh meñ ik ḳhāsa batāshā

mire moze pahan kar jā rahā thā

vahīñ ik chuhiyā aa niklī kahīñ se

Tapaktā naaz thā us kī jabīñ se

basā thā itr meñ har resha us kā

pare thā arsh se andesha us kā

bahut ban-Than ke niklī thī bichārī

miyāñ chūhe ne fauran aañkh maarī

nigāh-e-ġhair se sharmā ga.ī vo

miyāñ chūhe se phir Takrā ga.ī vo

mile yuuñ tālib-o-matlūb bāham

majāzī ishq kā lahrāyā parcham

ġharaz chūhe qayāmat Dhā rahe haiñ

dar-o-dīvār par mañDlā rahe haiñ

maiñ laayā thā kahīñ se ek billī

pakaḌ kar le ga.e chūhe use bhī

ajab shai hai kirae ka makan bhi

makan bhi hai ye zalim la-makan bhi

baDi ujlat mein banwaya gaya hai

lai se chhat ko chipkaya gaya hai

hai waqe ek nali ke kinare

mayassar hain mujhe kya kya nazare

nazir un ki jahan-e-KHwab mein hai

bahaaran ki shab-e-mahtab mein hai

na kyon ho jism mera ranj se chur

faqat do mil hai ye shahr se dur

yahan aab-o-hawa ka masKH chehra

mila hargiz na mauqa dekhne ka

hum aapas mein bahut ghul-mil gae hain

mujhe jebon mein chamgadaD mile hain

hain baam-o-dar pe ye ghaarat-gar-e-hosh

bahaar-e-bistar-o-nau-roz-e-aghosh

hamari ab ye haalat ho gai hai

andheron se mohabbat ho gai hai

yahan din ko bhi ullu bolte hain

mere kanon mein amras gholte hain

jo duniya mein hain ye kiDe-makoDe

yahin pal kar jawan hote hain sare

ghubar-alud yun meri jabin hai

kahin siDhi kahin kuchh bhi nahin hai

isi siDhi ka hai wo waqia bhi

luDhak kar mar gai jo sas meri

yahan chuhon ke bil itne baDe hain

kai sabit qadam in mein gire hain

mujhe bhi dur ki ek roz sujhi

kisi bil ko main khodun ji mein aai

jo khoda chashm-e-hairan ne ye dekha

ki ek leader numa moTa sa chuha

dabae munh mein ek KHasa batasha

mere moze pahan kar ja raha tha

wahin ek chuhiya aa nikli kahin se

Tapakta naz tha us ki jabin se

basa tha itr mein har resha us ka

pare tha arsh se andesha us ka

bahut ban-Than ke nikli thi bichaari

miyan chuhe ne fauran aankh mari

nigah-e-ghair se sharma gai wo

miyan chuhe se phir Takra gai wo

mile yun talib-o-matlub baham

majazi ishq ka lahraya parcham

gharaz chuhe qayamat Dha rahe hain

dar-o-diwar par manDla rahe hain

main laya tha kahin se ek billi

pakaD kar le gae chuhe use bhi