کسی شہر میں ایک رہتا تھا راجہ

کسی شہر میں ایک رہتا تھا راجا

وہ راجہ تھا بجتا ہوا ایک باجا

یوں ہی آتے جاتوں سے تکرار کرتا

ہوا پر بھی تلوار سے وار کرتا

سناؤں تمہیں ایک دن کی کہانی

مسہری پہ بیٹھی تھی راجہ کی رانی

کہ اتنے میں اک ننھی منی سی چڑیا

لئے چونچ میں ایک چھوٹا سا تنکا

چلی آئی رانی کے کمرے کے اندر

اور آ بیٹھی رانی کے بالکل برابر

یہ دیکھا تو راجہ نے تیوری چڑھائی

اٹھا اور غصے سے تالی بجائی

دیا حکم فوجوں کا سالار آئے

کہ فوج آ کے چڑیا پہ گولی چلئے

ملا حکم فوجوں کا سالار آیا

پرا آ کے فوجوں کا اس نے جمایا

مگر ننھی چڑیا تھی ہمت کی عالی

کیا اس نے دشمن کا ہر وار خالی

وہ اڑتی پھری سارے کمرے کے اندر

اور آ بیٹھی رانی کے کندھے کے اوپر

تو رانی کو اس پر بہت پیار آیا

اسے اپنے آنچل میں جھٹ پٹ چھپایا

یہ دیکھا تو راجہ بہت سٹپٹایا

مگر اپنی رانی سے کچھ کہہ نہ پایا

تو رانی اسے دیکھ کر مسکرا دی

اٹھی اور کھڑکی سے چڑیا اڑا دی