kitna mushkil hai

maiñ sun rahā huuñ

maiñ sun rahā huuñ

tumhārī āñkhoñ kā shor

tumhāre masāmoñ se buuñd buuñd Tapaktī huī āvāzeñ

tumhārī chhātiyoñ kī niilī niilī lakīroñ ke darmiyān

kunmunāte hue bachchoñ kī sargoshiyāñ

palak jhapakte hī

shahr kā shahr hijrat kar gayā

paḌāv Daal diye ga.e vahāñ

jahāñ koī mausam nahīñ hotā

daraḳht parindoñ se ḳhālī

bachchoñ ko niiñd nahīñ aatī

kuchh rūnumā nahīñ hotā

chīzoñ ne apne ma.amūl badal diye haiñ

rasūl aate haiñ aur be-bayān chale jaate haiñ

ḳhudā kī bastiyāñ kabhī itnī vīrān nahīñ huī thiiñ

ab tum aaoge

to dekhoge

vaqt,

jahāñ tahāñ se phaT gayā hai

use apnī raah par laanā

kitnā āsān hai kitnā mushkil

un sā.atoñ par kamandeñ Dālnā

jinhoñ ne mauqa.a pā kar apnī raftār pakaḌ lī

dekhte hī dekhte

dūsrī ābādiyoñ kī taraf nikal ga.iiñ

bujhī huī raakh ke Dher meñ

tasalliyāñ muñh bisore hue paḌī haiñ

amaltās kī sūkhī shāḳhoñ par

Tañge hue haiñ sabr ke chīthḌe

purzoñ meñ badal chuke haiñ

ārzūoñ ke be-pāyāñ tasalsul

Dhā chuke haiñ

andar hī andar shīr-ḳhār ummīdoñ ke Tiile

jinheñ dekh kar

tumheñ yaad aa.egā

rishtoñ ke bharam kitne saffāk hote haiñ

kitne pur-zor hote haiñ vāste

jo TūTte haiñ

to un meñ se ek chīḳh bhī barāmad nahīñ hotī

saarā jahān hī TuuT, bikhar jaatā hai

gardish karte hue ḳhuun meñ

barf kī kīleñ gaḌ jaatī haiñ

jaise saarā jism hī aa gayā ho

kisī sarkash āñdhī kī zad meñ

aur ek ek kar ke

haDDiyoñ ke saare joḌ hī khulte jā rahe hoñ

bikharte jā rahe hoñ saare masām

girte jā rahe hoñ

ham un chauhaḌoñ par

jahāñ sirf ḳhvāboñ ke biij bo.e jaate haiñ

aur fasl ke naam par

hāfize ke azaab numū paate haiñ

jaise ham ek aziim hijr kī paidāvār haiñ

umreñ dukhoñ ke hisāb se tavīl

dukh dushman kī bedār nigāhoñ se ziyāda zinda

apne kāñdhoñ par

apnī sāñsoñ ke ḳhamiyāze haiñ

aur maiñ

apnī hī nīndoñ meñ dauḌte dauḌte thak gayā huuñ

main sun raha hun

main sun raha hun

tumhaari aankhon ka shor

tumhaare masamon se bund bund Tapakti hui aawazen

tumhaari chhatiyon ki nili nili lakiron ke darmiyan

kunmunate hue bachchon ki sargoshiyan

palak jhapakte hi

shahr ka shahr hijrat kar gaya

paDaw Dal diye gae wahan

jahan koi mausam nahin hota

daraKHt parindon se KHali

bachchon ko nind nahin aati

kuchh runuma nahin hota

chizon ne apne mamul badal diye hain

rasul aate hain aur be-bayan chale jate hain

KHuda ki bastiyan kabhi itni viran nahin hui thin

ab tum aaoge

to dekhoge

waqt,

jahan tahan se phaT gaya hai

use apni rah par lana

kitna aasan hai kitna mushkil

un saaton par kamanden Dalna

jinhon ne mauqa pa kar apni raftar pakaD li

dekhte hi dekhte

dusri aabaadiyon ki taraf nikal gain

bujhi hui rakh ke Dher mein

tasalliyan munh bisore hue paDi hain

amaltas ki sukhi shaKHon par

Tange hue hain sabr ke chithDe

purzon mein badal chuke hain

aarzuon ke be-payan tasalsul

Dha chuke hain

andar hi andar shir-KHar ummidon ke Tile

jinhen dekh kar

tumhein yaad aaega

rishton ke bharam kitne saffak hote hain

kitne pur-zor hote hain waste

jo TuTte hain

to un mein se ek chiKH bhi baramad nahin hoti

sara jahan hi TuT, bikhar jata hai

gardish karte hue KHun mein

barf ki kilen gaD jati hain

jaise sara jism hi aa gaya ho

kisi sarkash aandhi ki zad mein

aur ek ek kar ke

haDDiyon ke sare joD hi khulte ja rahe hon

bikharte ja rahe hon sare masam

girte ja rahe hon

hum un chauhaDon par

jahan sirf KHwabon ke bij boe jate hain

aur fasl ke nam par

hafize ke azab numu pate hain

jaise hum ek azim hijr ki paidawar hain

umren dukhon ke hisab se tawil

dukh dushman ki bedar nigahon se ziyaada zinda

apne kandhon par

apni sanson ke KHamiyaze hain

aur main

apni hi nindon mein dauDte dauDte thak gaya hun