kunwara aangan

sukūt-e-shab

kahīñ vīrāniyāñ

jaadū kahīñ Tonā

kahīñ pīpal tale rahtā hai koī bhuut kā saaya

har ik aahaT pe kyoñ hotā gumāñ

koī magar aayā

añdhere meñ huī jumbish

ye karvaT kis ke lene kī

khanaktī chūḌiyāñ

pāzeb ghuñghrū

kis ke bajne kī

kahāñ se aa.ī ye jhankār

kis kī ye sadā aa.ī

ye kis ke ghar se uḌ kar mere āñgan meñ

ridā aa.ī

ye aayā kaun hai

dekho chaman meñ

sehn-e-gulshan meñ

ki billī kuud kar baiThī hai koī

ghar ke bartan meñ

koī aayā hai

dekho

koī aayā hai muñDeroñ se

koī aane ko hai uTh kar añdhere muñh

saveroñ se

koī ik ḳhauf an-jānā samāyā hai

har ik tan meñ

kahāñ sumitā hai

dekho

phūlvantī hai kahāñ soī

koī āvāz ik bīmār uTThī ghar ke āñgan meñ

uThā sukhrām lañgḌātā huā

lekin kahāñ dekhe

añdherā har taraf

jaa.e kahāñ

DhūñDe

kahāñ pūchhe

na bijlī hai

na baatī hai

na jaltā hai diyā koī

nigoḌā chāñd bhī hai jā ke soyā duur bastī meñ

uThā sukhrām lekin us ko Dar thā

vo kidhar jaa.e

añdhere meñ ye sar us kā muñDeroñ se na Takrā.e

sukut-e-shab

kahin viraniyan

jadu kahin Tona

kahin pipal tale rahta hai koi bhut ka saya

har ek aahaT pe kyon hota guman

koi magar aaya

andhere mein hui jumbish

ye karwaT kis ke lene ki

khanakti chuDiyan

pazeb ghunghru

kis ke bajne ki

kahan se aai ye jhankar

kis ki ye sada aai

ye kis ke ghar se uD kar mere aangan mein

rida aai

ye aaya kaun hai

dekho chaman mein

sehn-e-gulshan mein

ki billi kud kar baiThi hai koi

ghar ke bartan mein

koi aaya hai

dekho

koi aaya hai munDeron se

koi aane ko hai uTh kar andhere munh

saweron se

koi ek KHauf an-jaana samaya hai

har ek tan mein

kahan sumita hai

dekho

phulwanti hai kahan soi

koi aawaz ek bimar uTThi ghar ke aangan mein

uTha sukhram langData hua

lekin kahan dekhe

andhera har taraf

jae kahan

DhunDe

kahan puchhe

na bijli hai

na baati hai

na jalta hai diya koi

nigoDa chand bhi hai ja ke soya dur basti mein

uTha sukhram lekin us ko Dar tha

wo kidhar jae

andhere mein ye sar us ka munDeron se na Takrae