mazdur

june kī garmī kaḌaktī dhuup lū chaltī huī

har ghaḌī mazdūr ke sar se qazā Taltī huī

sar pe gaare kī kaḌhā.ī aur dīvār-e-buland

hāñptā vo chaḌh rahā hai le ke himmat kī kamand

paaḌ par pahuñchā to ik gaalī sunī me.amār se

jī meñ aayā sar ko Takrā de usī dīvār se

haa.e us mazlūm kī majbūriyāñ nā-chāriyāñ

jaan kā āzār haiñ iflās kī bīmāriyāñ

dil meñ kahtā hai ki ye me.amār bhī mazdūr hai

phir yahī jān-e-hazīñ kyuuñ is qadar maqhūr hai

us kī ujrat mujh se dugunī hai magar kam hai shu.ūr

tamkanat kis baat par kis chiiz par itnā ġhurūr

maiñ agar nādār huuñ ye bhī nahīñ sarmāya-dār

bhuut vo hai kis baḌā.ī kā jo us par hai savār

iiñT gaarā maiñ na duuñ us ko to ye kis kaam kā

asl meñ me.amār maiñ huuñ ye faqat hai naam kā

merī himmat kah rahīñ haiñ kāḳh-e-dīvān-e-buland

aah is par bhī maiñ duniyā meñ huuñ itnā mustamand

lag gayā phir kaam meñ ye soch kar vo bad-nasīb

ai ḳhudā duniyā meñ itnā bhī na ho koī ġharīb

din Dhalā jis vaqt mālik bhī makāñ kā aa gayā

ik sukūt-e-marg sā dīvār-o-dar par chhā gayā

kāñptā rahtā hai har mazdūr jis ke naam se

sab usī dhun meñ the vo ḳhush ho hamāre kaam se

us kī peshānī pe lekin bal zarā aane lage

phan uThā kar tamkanat ke saañp lahrāne lage

sab se pahle us ne gaalī dī usī me.amār ko

apnī milkiyyat jo samjhā thā har ik dīvār ko

josh-e-naḳhvat se kahā us ne ki ai paajī la.iiñ

kal jahāñ tak thī ga.ī dīvār ab bhī hai vahīñ

kyā kiyā hai tū ne din-bhar meñ zarā mujh ko batā

yuuñ takabbur meñ vo aa kar jā.eza lene lagā

dil meñ vo mazdūr phir kahne lagā uf re ġhazab

jo bhī is duniyā meñ haiñ fir.aun haiñ vo sab ke sab

jis kā jis par bas chale pāmāl kartā hai use

ḳhud agar ḳhush-hāl hai bad-hāl kartā hai use

kyā kahūñ sarmāya-dāroñ ke sitam kī dāstāñ

dīda-e-mazdūr hai mazdūr se bhī ḳhūñfishāñ

jis kī lāThī us kī bhaiñs is misl ko sādiq samajh

ye samajh kar is ḳhudā-e-pāk ko rāziq samajh

june ki garmi kaDakti dhup lu chalti hui

har ghaDi mazdur ke sar se qaza Talti hui

sar pe gare ki kaDhai aur diwar-e-buland

hanpta wo chaDh raha hai le ke himmat ki kamand

paD par pahuncha to ek gali suni meamar se

ji mein aaya sar ko Takra de usi diwar se

hae us mazlum ki majburiyan na-chaariyan

jaan ka aazar hain iflas ki bimariyan

dil mein kahta hai ki ye meamar bhi mazdur hai

phir yahi jaan-e-hazin kyun is qadar maqhur hai

us ki ujrat mujh se duguni hai magar kam hai shuur

tamkanat kis baat par kis chiz par itna ghurur

main agar nadar hun ye bhi nahin sarmaya-dar

bhut wo hai kis baDai ka jo us par hai sawar

inT gara main na dun us ko to ye kis kaam ka

asl mein meamar main hun ye faqat hai nam ka

meri himmat kah rahin hain kaKH-e-diwan-e-buland

aah is par bhi main duniya mein hun itna mustamand

lag gaya phir kaam mein ye soch kar wo bad-nasib

ai KHuda duniya mein itna bhi na ho koi gharib

din Dhala jis waqt malik bhi makan ka aa gaya

ek sukut-e-marg sa diwar-o-dar par chha gaya

kanpta rahta hai har mazdur jis ke nam se

sab usi dhun mein the wo KHush ho hamare kaam se

us ki peshani pe lekin bal zara aane lage

phan uTha kar tamkanat ke sanp lahrane lage

sab se pahle us ne gali di usi meamar ko

apni milkiyyat jo samjha tha har ek diwar ko

josh-e-naKHwat se kaha us ne ki ai paji lain

kal jahan tak thi gai diwar ab bhi hai wahin

kya kiya hai tu ne din-bhar mein zara mujh ko bata

yun takabbur mein wo aa kar jaeza lene laga

dil mein wo mazdur phir kahne laga uf re ghazab

jo bhi is duniya mein hain firaun hain wo sab ke sab

jis ka jis par bas chale pamal karta hai use

KHud agar KHush-haal hai bad-haal karta hai use

kya kahun sarmaya-daron ke sitam ki dastan

dida-e-mazdur hai mazdur se bhi KHunfishan

jis ki laThi us ki bhains is misl ko sadiq samajh

ye samajh kar is KHuda-e-pak ko raaziq samajh