لورکا

زمیں پہ اڑتیس بار پتوں کا رنگ بدلا

رتوں کی مہلت تو مختصر تھی

مگر تمہاری صداؤں میں جاگتی تھیں صدیاں

گٹار کا ایک سر اداسی

کسی پرندے کی چیخ جیسے

تمہارے گیتوں کا دوسرا سر نشاط تازہ

کہ جیسے چشمے ابل رہے ہوں

تمہاری نظمیں قدیم رازوں کی سرسراہٹ

رگوں میں جیسے لہو کی ہلچل

لہو تمہارا لہو درختوں کے پاس مٹی میں جذب

گہری جڑوں میں گم ہے

مگر ہوائیں نگر نگر شاعروں کے دامن میں ڈالتی ہیں

تمہارے گیتوں کے پھول

خوابوں کی ٹہنیوں کی سفید کلیاں

وہ سبز حیرت

جو تم نے زیتون کے درختوں میں گھلتے دیکھی

نظر نظر میں چمک رہی ہے

تمہارا بربط یہ کہہ رہا ہے

کہ گیت بندوق سے بڑا ہے