man

bahut saal pahle

maiñ ik bhīgtī raat meñ

āḳhirī show se lauTā to dahlīz par merī maañ

āhaToñ se gulū-gīr āvāz meñ pūchhtī thī

kahīñ mere bachche ko dekhā hai bhaa.ī

mujhe yaad hai us ke chehre pe ġhussa nahīñ thā

na hoñToñ pe harf-e-malāmat na shikva

vo chup-chāp mujh se lipaT kar

bahut der tak roī thī

balāoñ ke sāgar meñ Duubī huī raat hai

bād-o-bārāñ ke tūfān se

dev-qāmat daraḳhtoñ ne apnī jaḌeñ chhoḌ dī haiñ

havā jaise bijlī ke tāroñ se uljhī huī

maut kī rāgnī gā rahī hai

bahut duur se aa rahā huuñ

bahut der tak bhīgne se badan kāñptā hai

mire ghar kī dahlīz ḳhāmosh hai

aur vo āñkheñ

jo mere liye jāgtī thiiñ

yahāñ se bahut duur peḌoñ ke saa.e tale so rahī haiñ

bahut sal pahle

main ek bhigti raat mein

aaKHiri show se lauTa to dahliz par meri man

aahaTon se gulu-gir aawaz mein puchhti thi

kahin mere bachche ko dekha hai bhai

mujhe yaad hai us ke chehre pe ghussa nahin tha

na honTon pe harf-e-malamat na shikwa

wo chup-chap mujh se lipaT kar

bahut der tak roi thi

balaon ke sagar mein Dubi hui raat hai

baad-o-baran ke tufan se

dew-qamat daraKHton ne apni jaDen chhoD di hain

hawa jaise bijli ke taron se uljhi hui

maut ki ragni ga rahi hai

bahut dur se aa raha hun

bahut der tak bhigne se badan kanpta hai

mere ghar ki dahliz KHamosh hai

aur wo aankhen

jo mere liye jagti thin

yahan se bahut dur peDon ke sae tale so rahi hain