man

vo kaun hai jo udaas rātoñ kī chāñdnī haiñ

ka.ī duā.eñ laboñ pe le kar

malūl ho kar

bhulā ke saarī thakān din kī

ye sochtī hai

ki maiñ na jaane hazār mīloñ pare jo baiThā huuñ

kis tarah huuñ

vo kaun hai jo udaas rātoñ ke rat-jage meñ

duāoñ kī mish.aleñ jalāne khaḌī huī hai

duā.eñ jis kī mire liye haiñ

maiñ un duāoñ ke zer-e-sāya

zamīn se āsmān kī jānib yuuñ mahv-e-parvāz huuñ ki jaise

bashar-gazīda ḳhudā se milne ko jā rahā ho

phir ek lamhe ko mere andar se itnī āvāzeñ gūñjtī haiñ

maiñ in se barsoñ se āshnā huuñ

ye haath jo ki buland ho kar laraz rahe haiñ

ye haath mere liye tahaffuz kā isti.āra

ye haath mere liye jahāñ kī

hazār ḳhushbū se bālā-tar haiñ

yahī to haiñ vo jinhoñ ne mujh ko

qadam uThānā qadam baḌhānā sikhā diyā hai

wo kaun hai jo udas raaton ki chandni hain

kai duaen labon pe le kar

malul ho kar

bhula ke sari thakan din ki

ye sochti hai

ki main na jaane hazar milon pare jo baiTha hun

kis tarah hun

wo kaun hai jo udas raaton ke rat-jage mein

duaon ki mishalen jalane khaDi hui hai

duaen jis ki mere liye hain

main un duaon ke zer-e-saya

zamin se aasman ki jaanib yun mahw-e-parwaz hun ki jaise

bashar-gazida KHuda se milne ko ja raha ho

phir ek lamhe ko mere andar se itni aawazen gunjti hain

main in se barson se aashna hun

ye hath jo ki buland ho kar laraz rahe hain

ye hath mere liye tahaffuz ka istiara

ye hath mere liye jahan ki

hazar KHushbu se baala-tar hain

yahi to hain wo jinhon ne mujh ko

qadam uThana qadam baDhana sikha diya hai