magarmachh ke aansu

ye aksar sochtī huuñ maiñ

ki bāteñ maiñ karūñ kis se

sabhī apne

magan haiñ apnī duniyā meñ

koī sāthī na hamdam hai

kahūñ jis se maiñ ġham apnā

na koī aisā shāna hai

ki jis par apnā sar rakh kar

karūñ ashkoñ se kuchh bāteñ

magar koī nahīñ merā

faqat tanhā.ī hai merī

mirī sāthī haiñ ghar kī chaar dīvāreñ

kabhī suunī nigāhoñ se

maiñ chhat ko taktī rahtī huuñ

ki mobile kī ghanTī bhī

bilā-maqsad nahīñ bajtī

mirī ḳhair-o-ḳhabar letā nahīñ koī

sab apne kārobār-e-zīst meñ masrūf rahte haiñ

mujhe lagtā hai

maiñ ‘uzv-e-mu’attal huuñ

maiñ ik bekār shai huuñ

koī hājat hī nahīñ jis kī kisī ko

magar jis din maiñ sab ko chhoḌ kar

is bazm-e-fānī se chalī jā.ūñgī

sab ko yaad ā.ūñgī

merī turbat pe aa aa kar

sabhī sham'eñ jalā.eñge

magarmachh ke sabhī aañsū bahā.enge

ye aksar sochti hun main

ki baaten main karun kis se

sabhi apne

magan hain apni duniya mein

koi sathi na hamdam hai

kahun jis se main gham apna

na koi aisa shana hai

ki jis par apna sar rakh kar

karun ashkon se kuchh baaten

magar koi nahin mera

faqat tanhai hai meri

meri sathi hain ghar ki chaar diwaren

kabhi suni nigahon se

main chhat ko takti rahti hun

ki mobile ki ghanTi bhi

bila-maqsad nahin bajti

meri KHair-o-KHabar leta nahin koi

sab apne karobar-e-zist mein masruf rahte hain

mujhe lagta hai

main ‘uzw-e-mu’attal hun

main ek bekar shai hun

koi hajat hi nahin jis ki kisi ko

magar jis din main sab ko chhoD kar

is bazm-e-fani se chali jaungi

sab ko yaad aaungi

meri turbat pe aa aa kar

sabhi sham'en jalaenge

magarmachh ke sabhi aansu bahaenge