مہاتما بدھ

بدھا عظیم شخص تھا

جو تخت و تاج چھوڑ کر

بتان نسل و قومیت

وقار عز و سلطنت

غرور جاہ و مرتبت

کے بندھنوں کو توڑ کر

بہ زیر سایۂ شجر

تپسیا میں محو تھا

گیان دھیان میں مگن

نئی روش خیال میں

جو آدمی کو آدمی کے ظلم سے نجات دے

جو ذات پات کے طلسم سامری کو مات دے

برہمنوں کی قدغنوں کا زور پاش پاش ہو

جہاں میں جو اندھیر ہے اسے شکست فاش ہو

وہ سوچتا چلا گیا اسے سراغ مل گیا

مہاتما مہاتما عظیم اس کی آتما

کہ جس کے دل میں کرب کائنات تھا

ستودۂ صفات تھا

پکار کر کہا کہ اے جہان غم کے باسیو

مری صدا کو تو سنو

اہنسا پرمو دھرما اک اصول لا زوال ہے

یہ فکر بے نظیر ہے یہ سوچ بے مثال ہے

کسی کو دکھ نہ دو کہ یہ گناہ ہے وبال ہے

جو اس سے منحرف ہوئے تو زندگی محال ہے

یہی ہے راز زندگی

طریق صلح و آشتی

یہی نجات روح ہے

یہی ہے دل کی شانتی

مہاتما عظیم تھا

مہاتما نے سچ کہا