mahbuba-e-derina se

ai ki tū ‘arsa-e-māzī meñ mire dil ke liye

bā’is-e-lutf pur-asrār huā kartī thī

mire haq meñ tire halke se taġhāful kī adā

sūrat-e-sang girāñ-bār huā kartī thī

mirī nazroñ meñ ye rangīnī-e-auqāt-e-sahar

tire ruḳhsār ke ġhāze kī jhalak thī jānāñ

tasht-e-tārīk meñ bikhre hue tāroñ kā hujūm

tirī mā'sūm nigāhoñ kī damak thī jānāñ

tire malbūs se chhantī huī ḳhushbū ke sivā

bū koī dil ko mire raas nahīñ aatī thī

maiñ ki āhista tujhe khīñch liyā kartā thā

tū jo sharmā ke mire paas nahīñ aatī thī

yaad to kar ki maiñ kis tarh tire hoñToñ ko

surḳh phūloñ kī nazākat se milā detā thā

bārhā maiñ tire halke se tabassum ke liye

apne muñh ko tire āñchal kī havā detā thā

vaqt bijlī kī sī raftār pakaḌ kar niklā

haa.e afsos vo ayyām-e-hasīñ biit ga.e

ek rangīn fasāne kā ye anjām huā

ulfateñ haar ga.iiñ aur sitam jiit ga.e

lekin ai dost vo ik ‘arsa-e-māzī thā faqat

us kī yādoñ ko dil-o-jāñ se miTānā hogā

hasrateñ le ke kahāñ jā.eñge ham sāhib-e-dil

dil ke ik gosha-e-vīrāñ meñ dabānā hogā

varna be-sūd mohabbat ke sabab jān-e-jahāñ

ham zamāne ke taqāzoñ se ulajh baiTheñge

ai ki tu ‘arsa-e-mazi mein mere dil ke liye

ba’is-e-lutf pur-asrar hua karti thi

mere haq mein tere halke se taghaful ki ada

surat-e-sang giran-bar hua karti thi

meri nazron mein ye rangini-e-auqat-e-sahar

tere ruKHsar ke ghaze ki jhalak thi jaanan

tasht-e-tarik mein bikhre hue taron ka hujum

teri ma'sum nigahon ki damak thi jaanan

tere malbus se chhanti hui KHushbu ke siwa

bu koi dil ko mere ras nahin aati thi

main ki aahista tujhe khinch liya karta tha

tu jo sharma ke mere pas nahin aati thi

yaad to kar ki main kis tarh tere honTon ko

surKH phulon ki nazakat se mila deta tha

barha main tere halke se tabassum ke liye

apne munh ko tere aanchal ki hawa deta tha

waqt bijli ki si raftar pakaD kar nikla

hae afsos wo ayyam-e-hasin bit gae

ek rangin fasane ka ye anjam hua

ulfaten haar gain aur sitam jit gae

lekin ai dost wo ek ‘arsa-e-mazi tha faqat

us ki yaadon ko dil-o-jaan se miTana hoga

hasraten le ke kahan jaenge hum sahib-e-dil

dil ke ek gosha-e-viran mein dabana hoga

warna be-sud mohabbat ke sabab jaan-e-jahan

hum zamane ke taqazon se ulajh baiThenge