maine kab ishq ke aadab

maiñ ne kab 'ishq ke ādāb sikhā.e tum ko

kab kahā Tuut ke chāho mujhe pāgal kar do

maiñ musāfir thī tire shahr meñ ik roz faqat

raat āñkhoñ meñ basar karne chalī aa.ī thī

tū ne is jism-e-mujassam ko ishāra de kar

apnī be-laus vafāoñ kā sahārā de kar

husn ko 'ishq ke paikar meñ badal Daalā thā

maiñ jo ulfat ko girāñ-yāb samajhtī thī kabhī

lā'l-o-gauhar jise nāyāb samajhtī thī kabhī

tū ne vo qīmtī patthar mirī jholī meñ bhare

tū mirī soch se aage mire ḳhvāboñ se pare

mujhe ulfat ke ka.ī shahr ghumā laayā thā

maiñ jo titlī ke ta'āqub meñ phirā kartī thī

phuul dar phuul havāoñ meñ uḌā kartī thī

tū ne ik roz jo haule se chhuā thā mujh ko

usī lamhe meñ ye ehsās huā thā mujh ko

maiñ hī titlī huuñ havā huuñ maiñ vafā kī ḳhushbū

maiñ hī nāzuk sī kalī huuñ maiñ hayā kī ḳhushbū

merī āñkhoñ se jahāñ bhar ke sitāre raushan

sirf do chaar nahīñ saare ke saare raushan

par achānak hī mujhe chhoḌ ke jaane vaale

merī āñkhoñ ko bhī patthar kā banāne vaale

vo tirā 'ishq sarāboñ kī tarah hī thā nā

tū haqīqat meñ bhī ḳhvāboñ kī tarah thā jānāñ

ab ye sochūñ to mujhe ye bhī gumāñ hotā hai

yaar ye rog-e-mohabbat bhī hai sāhir kī tarah

jis ko lag jaa.e pirītam hī banā detā hai

pahle 'āshiq ko dikhātā hai ka.ī ḳhvāb hasīñ

phir unheñ chhīn ke āñkhoñ ko sazā detā hai

main ne kab 'ishq ke aadab sikhae tum ko

kab kaha Tut ke chaho mujhe pagal kar do

main musafir thi tere shahr mein ek roz faqat

raat aankhon mein basar karne chali aai thi

tu ne is jism-e-mujassam ko ishaara de kar

apni be-laus wafaon ka sahaara de kar

husn ko 'ishq ke paikar mein badal Dala tha

main jo ulfat ko giran-yab samajhti thi kabhi

la'l-o-gauhar jise nayab samajhti thi kabhi

tu ne wo qimti patthar meri jholi mein bhare

tu meri soch se aage mere KHwabon se pare

mujhe ulfat ke kai shahr ghuma laya tha

main jo titli ke ta'aqub mein phira karti thi

phul dar phul hawaon mein uDa karti thi

tu ne ek roz jo haule se chhua tha mujh ko

usi lamhe mein ye ehsas hua tha mujh ko

main hi titli hun hawa hun main wafa ki KHushbu

main hi nazuk si kali hun main haya ki KHushbu

meri aankhon se jahan bhar ke sitare raushan

sirf do chaar nahin sare ke sare raushan

par achanak hi mujhe chhoD ke jaane wale

meri aankhon ko bhi patthar ka banane wale

wo tera 'ishq sarabon ki tarah hi tha na

tu haqiqat mein bhi KHwabon ki tarah tha jaanan

ab ye sochun to mujhe ye bhi guman hota hai

yar ye rog-e-mohabbat bhi hai sahir ki tarah

jis ko lag jae piritam hi bana deta hai

pahle 'ashiq ko dikhata hai kai KHwab hasin

phir unhen chhin ke aankhon ko saza deta hai