majburi

bahut jī chāhtā hai har kisī se pyaar karne ko

magar aisī kahāñ qismat ki dil mujh ko Darātā hai

ka.ī be-rañg se ḳhāke ka.ī sad-rañg tasvīreñ

ḳhudā ma.alūm kin tārīkiyoñ se khīñch laatā hai

sunātā hai kabhī biitī huī bātoñ kī shahnā.ī

kabhī maazī ke album se mujhe photo dikhātā hai

jinheñ maiñ bhuul jaanā chāhtā huuñ vo hasīñ chehre

zabardastī dikhātā aur mujh par muskurātā hai

unheñ kyā jānte ho tum unheñ pahchānte ho tum

adā-e-tanz se har ek par uñglī uThātā hai

yahī to haiñ vo jin ke rāt-din tum giit gaate the

yahī to haiñ vo jin par pyaar ab bhī tum ko aatā hai

maiñ kahtā huuñ ḳhudā ke vāste ḳhāmosh ho jaao

satāne meñ kisī majbūr ko kyā lutf aatā hai

mirī majbūriyāñ kaafī nahīñ kyā muñh chiḌhāne ko

jo tū bhī muñh chiḌhātā aur merī jaan khātā hai

jise maiñ chāhtā huuñ pyaar kar saktā nahīñ us se

maiñ jis se pyaar kartā huuñ vo mujh se ruuTh jaatā hai

bahut ji chahta hai har kisi se pyar karne ko

magar aisi kahan qismat ki dil mujh ko Daraata hai

kai be-rang se KHake kai sad-rang taswiren

KHuda malum kin tarikiyon se khinch lata hai

sunata hai kabhi biti hui baaton ki shahnai

kabhi mazi ke album se mujhe photo dikhata hai

jinhen main bhul jaana chahta hun wo hasin chehre

zabardasti dikhata aur mujh par muskuraata hai

unhen kya jaante ho tum unhen pahchante ho tum

ada-e-tanz se har ek par ungli uThata hai

yahi to hain wo jin ke raat-din tum git gate the

yahi to hain wo jin par pyar ab bhi tum ko aata hai

main kahta hun KHuda ke waste KHamosh ho jao

satane mein kisi majbur ko kya lutf aata hai

meri majburiyan kafi nahin kya munh chiDhane ko

jo tu bhi munh chiDhata aur meri jaan khata hai

jise main chahta hun pyar kar sakta nahin us se

main jis se pyar karta hun wo mujh se ruTh jata hai