majburi

barāh-e-rāst jo utre the āsmāñ se hurūf

javāz ban na sake tarjumān ban na sake

qunūtiyat kā huuñ qaa.il na maiñ rajā.ī huuñ

payāmbar huuñ na mujh par huā hai koī nuzūl

ḳhud apnī zaat se pheñkā gayā thā maiñ bāhar

zamīn par huuñ zamīñ se ta'alluqāt nahīñ

bhaTak rahā huuñ maiñ be-rishtagī ke sahrā meñ

ye e'tizāl hai bas mere karb kā maḳhraj

ye bāzyāft hai merī aziyyatoñ kā sabab

is ehtijāj pe mujh ko kiyā gayā maslūb

mujhe bhī koī muqaddas kitāb de jaao

ye āgahī kā musalsal 'azāb le jaao

barah-e-rast jo utre the aasman se huruf

jawaz ban na sake tarjuman ban na sake

qunutiyat ka hun qail na main rajai hun

payambar hun na mujh par hua hai koi nuzul

KHud apni zat se phenka gaya tha main bahar

zamin par hun zamin se ta'alluqat nahin

bhaTak raha hun main be-rishtagi ke sahra mein

ye e'tizal hai bas mere karb ka maKHraj

ye bazyaft hai meri aziyyaton ka sabab

is ehtijaj pe mujh ko kiya gaya maslub

mujhe bhi koi muqaddas kitab de jao

ye aagahi ka musalsal 'azab le jao