manzar se bichhaDne ka karb

ham apne manzar se bichhḌe

ā.ankhoñ meñ us kā aks liye bhaTak rahe haiñ

koī na.ī rut hameñ panāh dene lagtī hai

to achānak...

be-duā lamhoñ ko kuchh nayā sūjhtā hai

aur saarā manzar badal jaatā hai

jahāñ pur-asrār āhaTeñ

hameñ ḳhauf ke jañgal meñ chhoḌ aatī haiñ

be-manzarī roz ham se shikva kartī hai

sub.h jāgte haiñ

to hamāre chehroñ par shaam hone lagtī hai

ajnabiyyat kī dhund hamārā saaya chhīn chukī hai

hamārī apnī zaat meñ fāsle itne gahre ho ga.e

ki ham ḳhud apnī hī dastaras se bāhar ho chuke

ham is manzar meñ nahīñ dafnā.e jā sakte

jis meñ ham ne janam liyā thā

ham ek muddat se

ā.ankhoñ kī gaThḌī meñ apne ḳhvāb bāñdhe

vaqt kī dahlīz par khaḌe chīḳh rahe haiñ

lekin hamārī āvāz kisī aur manzar meñ rah ga.ī hai

be-saut pukār par āsmān ashk-bār hotā hai

to hamārī fasloñ meñ bhuuk chupke se ghus jaatī hai

dasht ne hamāre shādāb jismoñ se paanī nichoḌ kar

un meñ pyaas bhar dī hai

idrāk kī sarhadoñ ke us paar

apne gum-shuda manzar ko ham ne kabhī nahīñ khojā

hameñ ḳhabar hai...

ham sab ne mil kar apnā manzar ḳhud gañvāyā hai

aur ab ham...

apne qaht-zada badan meñ chhup kar baiTh ga.e haiñ

hum apne manzar se bichhDe

aaankhon mein us ka aks liye bhaTak rahe hain

koi nai rut hamein panah dene lagti hai

to achanak

be-dua lamhon ko kuchh naya sujhta hai

aur sara manzar badal jata hai

jahan pur-asrar aahaTen

hamein KHauf ke jangal mein chhoD aati hain

be-manzari roz hum se shikwa karti hai

subh jagte hain

to hamare chehron par sham hone lagti hai

ajnabiyyat ki dhund hamara saya chhin chuki hai

hamari apni zat mein fasle itne gahre ho gae

ki hum KHud apni hi dastaras se bahar ho chuke

hum is manzar mein nahin dafnae ja sakte

jis mein hum ne janam liya tha

hum ek muddat se

aaankhon ki gaThDi mein apne KHwab bandhe

waqt ki dahliz par khaDe chiKH rahe hain

lekin hamari aawaz kisi aur manzar mein rah gai hai

be-saut pukar par aasman ashk-bar hota hai

to hamari faslon mein bhuk chupke se ghus jati hai

dasht ne hamare shadab jismon se pani nichoD kar

un mein pyas bhar di hai

idrak ki sarhadon ke us par

apne gum-shuda manzar ko hum ne kabhi nahin khoja

hamein KHabar hai

hum sab ne mil kar apna manzar KHud ganwaya hai

aur ab hum

apne qaht-zada badan mein chhup kar baiTh gae hain