masiha ki qatil

tum masīhā ho ki qātil ho maiñ kyoñ batlā.ūñ

ḳhud ye tārīḳh ke aurāq batā.eñge tumheñ

tum ho me.amār na.ī ziist ke yā qātil ho

faisla vaqt ke hāthoñ se yahī honā hai

dauḌ har samt hai phir Tankoñ tayyāroñ kī

amn-e-ālam hai ki phir zad pe hai hathiyāroñ kī

har taraf jang ke hālāt banā rakkhe haiñ

haath mazlūm ke patthar meñ dabā rakkhe haiñ

tum ne is daur ko sarmāya kī zanjīroñ se

qaid kar rakkhā hai har samt jakaḌ rakkhā hai

ismateñ izzateñ sab qaid meñ haiñ

mehnateñ rāhateñ sab qaid meñ haiñ

ziist parvān chaḌhegī ki nahīñ

zaḳhm-e-dil phuul baneñge ki ajal

ḳhud ye tārīḳh ke aurāq batā.eñge tumheñ

tum masīhā ho ki qātil ho maiñ kyoñ batlā.ūñ

shahr-o-dehāt kī na.aroñ se fazā gūñjegī

jald TūTegī ye zanjīr sadā gūñjegī

aaj mehnat hai agar qaid rahā bhī hogī

zindagī ke liye āzād fazā bhī hogī

mehnat-o-rāhat-o-izzat kā lahū

ab tire jaam se hai jald chhalakne vaalā

chhup sakeñge na chhupāne se lahū ke dhabbe

ḳhud hī ik din tire dāman pe ubhar ā.eñge

ḳhud hī tārīḳh ke aurāq pukār uTTheñge

ki masīhā nahīñ is daur ke qātil tum ho

tum masiha ho ki qatil ho main kyon batlaun

KHud ye tariKH ke auraq bataenge tumhein

tum ho meamar nai zist ke ya qatil ho

faisla waqt ke hathon se yahi hona hai

dauD har samt hai phir Tankon tayyaron ki

amn-e-alam hai ki phir zad pe hai hathiyaron ki

har taraf jang ke haalat bana rakkhe hain

hath mazlum ke patthar mein daba rakkhe hain

tum ne is daur ko sarmaya ki zanjiron se

qaid kar rakkha hai har samt jakaD rakkha hai

ismaten izzaten sab qaid mein hain

mehnaten rahaten sab qaid mein hain

zist parwan chaDhegi ki nahin

zaKHm-e-dil phul banenge ki ajal

KHud ye tariKH ke auraq bataenge tumhein

tum masiha ho ki qatil ho main kyon batlaun

shahr-o-dehat ki naron se faza gunjegi

jald TuTegi ye zanjir sada gunjegi

aaj mehnat hai agar qaid raha bhi hogi

zindagi ke liye aazad faza bhi hogi

mehnat-o-rahat-o-izzat ka lahu

ab tere jam se hai jald chhalakne wala

chhup sakenge na chhupane se lahu ke dhabbe

KHud hi ek din tere daman pe ubhar aaenge

KHud hi tariKH ke auraq pukar uTThenge

ki masiha nahin is daur ke qatil tum ho