mausam-e-bahaaran

aayā basant jashn-e-bahārāñ liye hue

har phuul hai mizāj-e-gulistāñ liye hue

dekho ki har shajar ne hai badlā nayā libās

har shāḳh-e-gul hai paikar-e-ḳhūbāñ liye hue

har samt aa rahe haiñ nazar zard zard phuul

har shāḳh hai matā'-e-bahārāñ liye hue

gul bhī na.e haiñ aur na.ī hai bahār bhī

har ek aaj hai nayā sāmāñ liye hue

har phuul tāktā hai mirī samt baar baar

terī nigāh-e-nāz kā armāñ liye hue

hotā hai ḳhatm mausam-e-sarmā kā bāñkpan

sarsoñ ke phuul haiñ na.e armāñ liye hue

har ġhuncha josh-e-husn se jannat-nigāh hai

har phuul hai bahisht kā sāmāñ liye hue

raas aa.e kaash ham ko bhī 'shādāñ' bahār-e-nau

ham bhī khaḌe haiñ chāk-e-garebāñ liye hue

aaya basant jashn-e-bahaaran liye hue

har phul hai mizaj-e-gulistan liye hue

dekho ki har shajar ne hai badla naya libas

har shaKH-e-gul hai paikar-e-KHuban liye hue

har samt aa rahe hain nazar zard zard phul

har shaKH hai mata'-e-bahaaran liye hue

gul bhi nae hain aur nai hai bahaar bhi

har ek aaj hai naya saman liye hue

har phul takta hai meri samt bar bar

teri nigah-e-naz ka arman liye hue

hota hai KHatm mausam-e-sarma ka bankpan

sarson ke phul hain nae arman liye hue

har ghuncha josh-e-husn se jannat-nigah hai

har phul hai bahisht ka saman liye hue

ras aae kash hum ko bhi 'shadan' bahaar-e-nau

hum bhi khaDe hain chaak-e-gareban liye hue