موسم بہاراں

آیا بسنت جشن بہاراں لیے ہوئے

ہر پھول ہے مزاج گلستاں لیے ہوئے

دیکھو کہ ہر شجر نے ہے بدلا نیا لباس

ہر شاخ گل ہے پیکر خوباں لیے ہوئے

ہر سمت آ رہے ہیں نظر زرد زرد پھول

ہر شاخ ہے متاع بہاراں لیے ہوئے

گل بھی نئے ہیں اور نئی ہے بہار بھی

ہر ایک آج ہے نیا ساماں لیے ہوئے

ہر پھول تاکتا ہے مری سمت بار بار

تیری نگاہ ناز کا ارماں لیے ہوئے

ہوتا ہے ختم موسم سرما کا بانکپن

سرسوں کے پھول ہیں نئے ارماں لیے ہوئے

ہر غنچہ جوش حسن سے جنت نگاہ ہے

ہر پھول ہے بہشت کا ساماں لیے ہوئے

راس آئے کاش ہم کو بھی شاداںؔ بہار نو

ہم بھی کھڑے ہیں چاک گریباں لیے ہوئے