مزدور

بار ہستی سے پریشان نظر آتا ہے

رنگ دنیا پہ وہ حیران نظر آتا ہے

بزم دانش میں پشیمان نظر آتا ہے

یورش غم سے وہ ہلکان نظر آتا ہے

شدت کرب سے بے جان نظر آتا ہے

پیکر درد وہ انسان نظر آتا ہے

صبح دم کھیت میں کھلیان میں کہساروں میں

شام تک ریت کے اٹھتے ہوئے طوفانوں میں

شاہراہوں میں کبھی شہر کے ایوانوں میں

تنگ گلیوں میں کبھی گاؤں کے میدانوں میں

شدت کرب سے بے جان نظر آتا ہے

پیکر درد وہ انسان نظر آتا ہے

پا بہ زنجیر وہ جکڑا ہوا خرکاروں میں

کوہ و صحرا میں کبھی دشت میں ویرانوں میں

میلے ٹھیلے میں کبھی عام گزر گاہوں میں

سبزہ زاروں میں کبھی اجڑے گلستانوں میں

شدت کرب سے بے جان نظر آتا ہے

پیکر درد وہ انسان نظر آتا ہے

ریگ زاروں میں سرنگوں میں نہاں خانوں میں

کشت ویراں میں کبھی گاؤں کے کھلیانوں میں

رزق کی کھوج میں جنگل میں بیابانوں میں

صبح تا شام مگن نت نئے ارمانوں میں

شدت کرب سے بے جان نظر آتا ہے

پیکر درد وہ انسان نظر آتا ہے

شورش درد سے دن رات سسکتا مزدور

جستجوئے رہ منزل میں بھٹکتا مزدور

زیب و زینت کی محافل سے جھجھکتا مزدور

اپنی محنت کے پسینے میں مہکتا مزدور

شدت کرب سے بے جان نظر آتا ہے

پیکر درد وہ انسان نظر آتا ہے