میرے بستے میں کیا ہے

اسکول کا لڑکا ہوں میں

ننھا سا بنجارہ ہوں میں

جو چیز ہے وہ خاص ہے

بستے میں میرے پاس ہے

کچھ ٹافیاں کچھ گولیاں

کچھ بیر کچھ نمکولیاں

کڑوی کسیلی چھالیہ

کچھ بچ گئیں کچھ کھا لیا

پرکار پنسل اور ربر

رنگین کاغذ اور کلر

یہ مور کے پر دیکھیے

لعل و جواہر دیکھیے

ماچس کے لیبل دیکھیے

کاغذ کی بلبل دیکھیے

لو یہ کہیں سے آ گئے

مرغی کے پر ٹوٹے ہوئے

سکے پرانے دور کے

لاہور کے بھنبور کے

یہ دھات ہے بولان کی

یہ اون چولستان کی

ٹکڑا ہے یہ بلور کا

تحفہ بہاولپور کا

نیلم ہے یہ کشمیر کا

یہ ہے نگینہ دیر کا

پھل وادیٔ کاغان کے

میوے وزیرستان کے

یہ ابن انشا کی کتاب

تحفہ ملا ہے لا جواب

تصویر رنگا رنگ ہے

جو دیکھتا ہے دنگ ہے

بلی نہیں بھالو ہے یہ

خرگوش کا خالو ہے یہ

یہ سب مرے بستے میں ہے

ہر پھول گلدستے میں ہے

جب پانچ پیسے لاؤ گے

تب ایک تحفہ پاؤ گے