meri urdu zaban

mere lab par na ho kyoñ tirī dāstāñ

merī urdu zabāñ merī urdu zabāñ

tujh se mīThā nahīñ koī shīrīñ-dahāñ

terī tā'rīf kaise karūñ maiñ bayāñ

rang saarī zabānoñ ke tujh meñ nihāñ

tujh pe qurbān lab-hā-e-shakkar-fashāñ

tū garanthoñ meñ hai saañs letī huī

tū bhajan meñ na.e rang detī huī

tū hai naġhmoñ ke dariyā meñ bahtī huī

pyaar ke sāhiloñ kī taraf hai ravāñ

'mīr' kī dhaḌkanoñ meñ samā.ī hai tū

fikr-e-'ġhālib' meñ bhī muskurā.ī hai tū

zehn-e-'iqbāl' meñ jagmagā.ī hai tū

tū 'firāq' aur 'chakbast' kī jān-e-jāñ

tujh se shoḳhī bhī shā.istagī bhī milī

'krishn'-o-'bedī' ke fan kī kalī bhī khilī

kitnī be-misl hai terī dariyā-dilī

terī āġhosh meñ sab ne paa.ī amaañ

fikr hai bas yahī tū rahe jāvedāñ

manzileñ tai kare ye tirā kārvāñ

laakh tūfāñ uTheñ aur chaleñ āñdhiyāñ

'azm-o-himmat kareñge tujhe kāmrāñ

mere lab par na ho kyon teri dastan

meri urdu zaban meri urdu zaban

tujh se miTha nahin koi shirin-dahan

teri ta'rif kaise karun main bayan

rang sari zabanon ke tujh mein nihan

tujh pe qurban lab-ha-e-shakkar-fashan

tu garanthon mein hai sans leti hui

tu bhajan mein nae rang deti hui

tu hai naghmon ke dariya mein bahti hui

pyar ke sahilon ki taraf hai rawan

'mir' ki dhaDkanon mein samai hai tu

fikr-e-'ghaalib' mein bhi muskurai hai tu

zehn-e-'iqbaal' mein jagmagai hai tu

tu 'firaq' aur 'chakbast' ki jaan-e-jaan

tujh se shoKHi bhi shaistagi bhi mili

'krishn'-o-'bedi' ke fan ki kali bhi khili

kitni be-misl hai teri dariya-dili

teri aaghosh mein sab ne pai aman

fikr hai bas yahi tu rahe jawedan

manzilen tai kare ye tera karwan

lakh tufan uThen aur chalen aandhiyan

'azm-o-himmat karenge tujhe kaamran