minnat

kisī mandir meñ

yā dargāh meñ

maiñ ne kabhī mannat nahīñ māñgī

koī dhāgā nahīñ bāñdhā

mirī jitnī bhī minnat aur mannat haiñ

tumhīñ se haiñ

har ik minnat pe

hoñToñ par

na.e ik she'r kā mazmūñ ubhartā hai

tumhārā naam

aayat kī tarah hoñToñ pe aatā hai

tilāvat hotī jaatī hai

muqaddas naam par

mannat ke dhāgoñ kī tarah

ash'ār kī girheñ lagā kar chhoḌ detā huuñ

du'ā-go huuñ

kabhī to merī mannat puurī hogī

kisī din to mirī ġhazleñ laboñ par tum sajāogī

kisī din to mire ash'ār kī ye saarī girheñ khol dogī

aur ye mannat ke dhāge

toḌ dogī tum

kisi mandir mein

ya dargah mein

main ne kabhi mannat nahin mangi

koi dhaga nahin bandha

meri jitni bhi minnat aur mannat hain

tumhin se hain

har ek minnat pe

honTon par

nae ek she'r ka mazmun ubharta hai

tumhaara nam

aayat ki tarah honTon pe aata hai

tilawat hoti jati hai

muqaddas nam par

mannat ke dhagon ki tarah

ash'ar ki girhen laga kar chhoD deta hun

du'a-go hun

kabhi to meri mannat puri hogi

kisi din to meri ghazlen labon par tum sajaogi

kisi din to mere ash'ar ki ye sari girhen khol dogi

aur ye mannat ke dhage

toD dogi tum