منت

کسی مندر میں

یا درگاہ میں

میں نے کبھی منت نہیں مانگی

کوئی دھاگا نہیں باندھا

مری جتنی بھی منت اور منت ہیں

تمہیں سے ہیں

ہر اک منت پہ

ہونٹوں پر

نئے اک شعر کا مضموں ابھرتا ہے

تمہارا نام

آیت کی طرح ہونٹوں پہ آتا ہے

تلاوت ہوتی جاتی ہے

مقدس نام پر

منت کے دھاگوں کی طرح

اشعار کی گرہیں لگا کر چھوڑ دیتا ہوں

دعا گو ہوں

کبھی تو میری منت پوری ہوگی

کسی دن تو مری غزلیں لبوں پر تم سجاؤ گی

کسی دن تو مرے اشعار کی یہ ساری گرہیں کھول دو گی

اور یہ منت کے دھاگے

توڑ دو گی تم