meri pyari amman

na kuchh mujh meñ tāqat thī jis aan ammāñ

na achchhe bure kī thī pahchān ammāñ

tumhīñ sab tarah thiiñ nigahbān ammāñ

tumhīñ ko thā har dam mirā dhyān ammāñ

mirī pyārī ammāñ mirī jaan ammāñ

mujhe pyaar se duudh tum ne pilāyā

thapak kar mohabbat se tum ne sulāyā

bahut din mujhe godiyoñ meñ phirāyā

mujhe sukh diyā aap hai dukh uThāyā

mirī pyārī ammāñ mirī jaan ammāñ

kabhī apnī godī meñ mujh ko liTānā

kabhī mīThī bātoñ se mujh ko hañsānā

kabhī pyaar karnā gale se lagānā

na bhūlūñgā maiñ umr bhar vo zamāna

mirī pyārī ammāñ mirī jaan ammāñ

jo dukh se kabhī niiñd mujh ko na aa.ī

to is fikr meñ raat tum ne gañvā.ī

kabhī kuchh davā.ī khilā.ī pilā.ī

kabhī koī mīThī sī lorī sunā.ī

mirī pyārī ammāñ mirī jaan ammāñ

tumhīñ ne hai achchhā tarīqa sikhāyā

tumhīñ ne hai rasta ḳhudā kā batāyā

tumhīñ ne gunāhoñ se mujh ko bachāyā

tumhīñ ne mujhe aadmī hai banāyā

mirī pyārī ammāñ mirī jaan ammāñ

bahut kī mire saath tum ne mohabbat

uThā.ī mire vāste saḳht mehnat

agar de ḳhudā mujh ko umr aur daulat

tumhārī bajā lā.ūñ har tarah ḳhidmat

mirī pyārī ammāñ mirī jaan ammāñ

na kuchh mujh mein taqat thi jis aan amman

na achchhe bure ki thi pahchan amman

tumhin sab tarah thin nigahban amman

tumhin ko tha har dam mera dhyan amman

meri pyari amman meri jaan amman

mujhe pyar se dudh tum ne pilaya

thapak kar mohabbat se tum ne sulaya

bahut din mujhe godiyon mein phiraya

mujhe sukh diya aap hai dukh uThaya

meri pyari amman meri jaan amman

kabhi apni godi mein mujh ko liTana

kabhi miThi baaton se mujh ko hansana

kabhi pyar karna gale se lagana

na bhulunga main umr bhar wo zamana

meri pyari amman meri jaan amman

jo dukh se kabhi nind mujh ko na aai

to is fikr mein raat tum ne ganwai

kabhi kuchh dawai khilai pilai

kabhi koi miThi si lori sunai

meri pyari amman meri jaan amman

tumhin ne hai achchha tariqa sikhaya

tumhin ne hai rasta KHuda ka bataya

tumhin ne gunahon se mujh ko bachaya

tumhin ne mujhe aadmi hai banaya

meri pyari amman meri jaan amman

bahut ki mere sath tum ne mohabbat

uThai mere waste saKHt mehnat

agar de KHuda mujh ko umr aur daulat

tumhaari baja laun har tarah KHidmat

meri pyari amman meri jaan amman