محبت اک ضرورت ہے

بہت سے لوگ کہتے ہیں

کہ رشتے گر ضرورت سے جڑے ہوں تو

وہ اکثر ٹوٹ جاتے ہیں

ضرورت پوری ہونے پر ضرورت مند اک دوجے سے اکثر روٹھ جاتے ہیں

مگر یہ بھی حقیقت ہے

کہ یہ دنیا ضرورت ہے

یہاں پر سانس لینا بات کرنا

ساتھ چلنا اور دھڑکنا

ہنستے ہنستے ایک دم خاموش ہونا

اور پھر چپکے سے رونا

یاد رکھنا بھول جانا

بھول جانے پر کسی کو یاد کر کے مسکرانا سب ضروری ہے

کسی کا نام لکھ کر ڈایری کو خود چھپانا

گیت لکھنا گنگنانا

خواب تکنا راہ تکنا

اور پھر اک دن کسی کی راہ میں چپکے سے مرنا سب ضروری ہے

یہاں سب کچھ ضرورت ہے

یہاں سب کچھ ضروری ہے

سو تم مانو نہ مانو

بس مجھے تو اچھا لگتا تھا

وہ جب بھی مجھ سے کہتا تھا

مجھے تیری ضرورت ہے

مجھے تیری ضرورت ہے

محبت اک ضرورت ہے

یہی تو اک عبادت ہے

ریاضت ہی ریاضت ہے