mufahamat

jab us kā bosa letā thā cigarette kī bū nathnoñ meñ ghus jaatī thī

maiñ tambākū-noshī ko ik aib samajhtā aayā huuñ

lekin ab maiñ aadī huuñ, ye merī zaat kā hissa hai

vo bhī mere dāñtoñ kī bad-rañgī se mānūs hai, in kī aadī hai

jab ham donoñ milte haiñ, lafzoñ se begāna se ho jaate haiñ

kamre meñ kuchh sāñseñ aur pasīne kī buu, tanhā.ī rah jaatī hai!

ham donoñ shāyad murda haiñ ehsās kā chashma sūkhā hai

yā phir shāyad aisā hai ye afsāna bosīda hai

dard-e-zeh se ziist yūñhī halkān taḌaptī rahtī hai

na.e masīhā aate haiñ aur suulī par chaḌh jaate haiñ

ik maTiyālā insān safoñ ko chiir ke aage baḌhtā hai aur mimbar se chillātā hai

ham maslūb ke vāris haiñ ye ḳhuun hamārā virsa hai

aur vo sab ādarsh, vo sab jo vaj.h-e-malāmat Thahrā thā

is maTiyāle shaḳhs ke gahre me.ade meñ khup jaatā hai

phir tafsīroñ aur tavīloñ kī shakl meñ bāhar aatā hai

ye tāvīleñ majbūroñ kā ik mauhūm sahārā haiñ

yā shāyad sab kā sahārā haiñ

yūñhī meñ ādarsh insān kā juuyā huuñ

sab hī sapne dekhte haiñ ḳhvāboñ meñ havā meñ uḌte haiñ

phir ik manzil aatī hai jab phuuT phuuT kar rote haiñ

shāḳhoñ kī tarah TūTte haiñ

ik rūh-e-jān-o-dil ko jo duniyā meñ sab se baḌh kar hai pā lete haiñ

phir us se nafrat karte haiñ go phir bhī mohabbat karte haiñ!

maiñ us se nafrat kartā huuñ vo mujh ko niich samajhtī hai

lekin jab ham milte haiñ tanhā.ī meñ tārīkī meñ

donoñ aise ho jaate haiñ jaise āġhushta miTTī haiñ

nafrat zam ho jaatī hai ik sannāTā rah jaatā hai

sannāTā taḳhlīq-e-zamīñ ke ba.ad jo har-sū taarī thā

ham donoñ TūTte rahte haiñ jaise ham kachchī shāḳheñ haiñ

ḳhvāboñ kā zikr nahīñ karte donoñ ne kabhī jo dekhte the

ḳhushiyoñ kā zikr nahīñ karte jo kab kī supurd-e-ḳhāk huiiñ

bas donoñ TūTte rahte haiñ

maiñ bāda-noshī par maa.il huuñ, vo cigarette piitī rahtī hai

ik sannāTe kī chādar meñ ham donoñ lipTe jaate haiñ

ham donoñ TūTte rahte haiñ jaise ham kachchī shāḳheñ haiñ!

jab us ka bosa leta tha cigarette ki bu nathnon mein ghus jati thi

main tambaku-noshi ko ek aib samajhta aaya hun

lekin ab main aadi hun, ye meri zat ka hissa hai

wo bhi mere danton ki bad-rangi se manus hai, in ki aadi hai

jab hum donon milte hain, lafzon se begana se ho jate hain

kamre mein kuchh sansen aur pasine ki bu, tanhai rah jati hai!

hum donon shayad murda hain ehsas ka chashma sukha hai

ya phir shayad aisa hai ye afsana bosida hai

dard-e-zeh se zist yunhi halkan taDapti rahti hai

nae masiha aate hain aur suli par chaDh jate hain

ek maTiyala insan safon ko chir ke aage baDhta hai aur mimbar se chillata hai

hum maslub ke waris hain ye KHun hamara wirsa hai

aur wo sab aadarsh, wo sab jo wajh-e-malamat Thahra tha

is maTiyale shaKHs ke gahre meade mein khup jata hai

phir tafsiron aur tawilon ki shakl mein bahar aata hai

ye tawilen majburon ka ek mauhum sahaara hain

ya shayad sab ka sahaara hain

yunhi mein aadarsh insan ka juya hun

sab hi sapne dekhte hain KHwabon mein hawa mein uDte hain

phir ek manzil aati hai jab phuT phuT kar rote hain

shaKHon ki tarah TuTte hain

ek ruh-e-jaan-o-dil ko jo duniya mein sab se baDh kar hai pa lete hain

phir us se nafrat karte hain go phir bhi mohabbat karte hain!

main us se nafrat karta hun wo mujh ko nich samajhti hai

lekin jab hum milte hain tanhai mein tariki mein

donon aise ho jate hain jaise aaghushta miTTi hain

nafrat zam ho jati hai ek sannaTa rah jata hai

sannaTa taKHliq-e-zamin ke baad jo har-su tari tha

hum donon TuTte rahte hain jaise hum kachchi shaKHen hain

KHwabon ka zikr nahin karte donon ne kabhi jo dekhte the

KHushiyon ka zikr nahin karte jo kab ki supurd-e-KHak huin

bas donon TuTte rahte hain

main baada-noshi par mail hun, wo cigarette piti rahti hai

ek sannaTe ki chadar mein hum donon lipTe jate hain

hum donon TuTte rahte hain jaise hum kachchi shaKHen hain!