mujhe kya ki wo main nahin tha

mujhe kyā agar mujh se pahle

ye dhartī mirī pyārī dhartī faqat ik hayūlā thī aur zīnat-e-tāq-e-nisyāñ thī

us kā tasavvur

mahz diyat ke chand zarre thī yā rāste the

ye vo log the jin kī saarī tag-o-dau hī dhartī se tark-e-ta.alluq pe mauqūf thī

havāoñ meñ un ke tilismī mahal the

ḳhalā meñ laTaktī thiiñ un kī nigāhoñ kī lāsheñ

mujhe kyā agar vo

sabhī apne dil ke dimāġhoñ ke āñkhoñ ke zaḳhmoñ kā marham sitāroñ meñ jā DhūñDte the

kabhī chāñd kī zard kirnoñ se jalte laboñ kī magar tishnagī ko bujhāte

unheñ ḳhabt thā ye havā.eñ sukūñ āshtī aur ulfat kā chashma haiñ

in ke ravāñ tund jhoñke hamārī pareshāniyoñ kā mudāvā haiñ

sūraj dimāġhoñ meñ kachche ḳhayāloñ kī fasleñ pakātā hai

dhartī to bas ham meñ ehsās-e-begānagī paidā kartī hai

rūheñ hamesha hī ik karb kī aag meñ jaltī rahtī haiñ

dhartī faqat ek zindāñ hai

jis se rihā.ī kī sūrat falak chāñd sitāroñ se mansūb hone meñ hai

mujhe kyā un ke jiine kā maqsad hī

apnī halākat thā ḳhud ko bhulānā thā

saarī tag-o-dau se maqsūd bas ḳhud-kushī thī

vo buzdil the sab apne qātil the andhe the

un kī nigāheñ zamīn dekh saktī nahīñ thiiñ

unheñ ḳhud kā ehsās tak bhī nahīñ thā

vo sab kuchh the lekin mujhe kyā

maiñ un ke liye apnī āñkhoñ ko dil ko abas āñsuoñ meñ ghulā.ūñ

maiñ kyoñ rāt-din un ke ġham meñ jalūñ

maiñ to un meñ nahīñ huuñ

vo andhe the qātil the apne liye the

mujhe kyā ki vo maiñ nahīñ thā

mujhe kya agar mujh se pahle

ye dharti meri pyari dharti faqat ek hayula thi aur zinat-e-taq-e-nisyan thi

us ka tasawwur

mahz diyat ke chand zarre thi ya raste the

ye wo log the jin ki sari tag-o-dau hi dharti se tark-e-talluq pe mauquf thi

hawaon mein un ke tilismi mahal the

KHala mein laTakti thin un ki nigahon ki lashen

mujhe kya agar wo

sabhi apne dil ke dimaghon ke aankhon ke zaKHmon ka marham sitaron mein ja DhunDte the

kabhi chand ki zard kirnon se jalte labon ki magar tishnagi ko bujhate

unhen KHabt tha ye hawaen sukun aashti aur ulfat ka chashma hain

in ke rawan tund jhonke hamari pareshaniyon ka mudawa hain

suraj dimaghon mein kachche KHayalon ki faslen pakata hai

dharti to bas hum mein ehsas-e-beganagi paida karti hai

ruhen hamesha hi ek karb ki aag mein jalti rahti hain

dharti faqat ek zindan hai

jis se rihai ki surat falak chand sitaron se mansub hone mein hai

mujhe kya un ke jine ka maqsad hi

apni halakat tha KHud ko bhulana tha

sari tag-o-dau se maqsud bas KHud-kushi thi

wo buzdil the sab apne qatil the andhe the

un ki nigahen zamin dekh sakti nahin thin

unhen KHud ka ehsas tak bhi nahin tha

wo sab kuchh the lekin mujhe kya

main un ke liye apni aankhon ko dil ko abas aansuon mein ghulaun

main kyon raat-din un ke gham mein jalun

main to un mein nahin hun

wo andhe the qatil the apne liye the

mujhe kya ki wo main nahin tha