mujhe sham aai hai shahr mein

maiñ safar meñ huuñ

mire jism par

haiñ hazār rañgoñ kī yūrisheñ

kahīñ surḳh phuul khilā huā

kahīñ niil hai

kahīñ sabz rañg hai zahr kā

magar aa.ina shab-e-shahr kā

mirī Dhaal hai

jo visāl hai

vahī asl hijr-misāl hai

mire sāmne vahī rāste

vahī bām-o-dar

vahī sañg haiñ vahī sūliyāñ

mujhe shaam aa.ī hai shahr meñ

mujhe shaam aa.ī hai shahr meñ

jahāñ āsmāñ kī vus.atoñ se

savāl kāsa-ba-dast lauTe the

yaad hai

shab hiila jo tujhe yaad hai

vo salīb

jis pe machān najm-e-sahar kī thī

vo ḳhatīb

jis kā ḳhitāb abrū huā se thā

vo sadā-e-zabt ajiib thī

kahīñ koḌhiyoñ kī shifā banī

kahīñ abr-o-bād se

chob-e-ḳhushk taḌaḳh rahī thī saver se

baḌī der se yahāñ marqadoñ ke gulāb

paañv kī dhuul haiñ

maiñ safar meñ huuñ

mujhe shaam aa.ī hai shahr meñ

mire haath meñ bhī kamān hai

mujhe tiir de

main safar mein hun

mere jism par

hain hazar rangon ki yurishen

kahin surKH phul khila hua

kahin nil hai

kahin sabz rang hai zahr ka

magar aaina shab-e-shahr ka

meri Dhaal hai

jo visal hai

wahi asl hijr-misal hai

mere samne wahi raste

wahi baam-o-dar

wahi sang hain wahi suliyan

mujhe sham aai hai shahr mein

mujhe sham aai hai shahr mein

jahan aasman ki wusaton se

sawal kasa-ba-dast lauTe the

yaad hai

shab hila jo tujhe yaad hai

wo salib

jis pe machan najm-e-sahar ki thi

wo KHatib

jis ka KHitab abru hua se tha

wo sada-e-zabt ajib thi

kahin koDhiyon ki shifa bani

kahin abr-o-baad se

chob-e-KHushk taDaKH rahi thi sawer se

baDi der se yahan marqadon ke gulab

panw ki dhul hain

main safar mein hun

mujhe sham aai hai shahr mein

mere hath mein bhi kaman hai

mujhe tir de