مکمل شعر

بہ مشکل ملنے والے

قرب کے لمحوں کو

یکجا جوڑ کر جو تھی سجائی

اس پگھلتی شام

مدھم روشنی میں

ریستراں کی میز پر

جب چاند میرے ساتھ بیٹھا تھا

مسالہ چائے کی چسکی پہ

اس کے جڑواں لب اک دوسرے سے مل رہے تھے

تب ہمارے ہجر کی مجبوریاں مصرعوں میں لپٹا کر

اسے اک شعر میں نے یوں سنایا تھا

تمہارے نام سے وابستہ ہے دوری کچھ اس حد تک

تمہارا نام لوں تو لب بھی آپس میں نہیں ملتے

میرا یہ شعر سن کر اس نے تھوڑی دیر سوچا

اور پھر دھیرے سے اپنا نام ہونٹوں پر سجا کر

اس نے میرے شعر کی تصدیق کر دی

اور مرا لکھنا مکمل ہو گیا تھا