مشاہدہ

مرے اک دوست نے مجھ سے

کہا اے شاہدؔ انور

ترا چہرہ ہزاروں میں الگ پہچان رکھتا ہے

تری آنکھیں حیا کی وہ نشانی ہیں

جنہیں میں روز تکتا ہوں

تری گفتار سے معصوم کلیاں مسکراتی ہیں

ترے الفاظ میں پیغام ہے زندہ دلی کا

ترے اشعار مجھ کو حوصلہ دن رات دیتے ہیں

یہ سب سنتے ہوئے حیرت سے

میں اپنے آپ میں خاموش بیٹھا تھا

مرا چہرہ مری آنکھیں

مری گفتار کے چرچے

مرے الفاظ اور اشعار

کوئی بھی اس قدر تعریف کے لائق کبھی نہ تھا

مگر اے دوست

محبت نے تری نظروں کو وہ تاثیر بخشی ہے

کہ مجھ سے عام انساں نے

ترے دل میں جگہ پا لی