muskuraati hui faza ho tum

muskurātī huī fazā ho tum

muskurātī huī fazā ho tum

gungunātī huī havā ho tum

sard lamhoñ meñ ghul rahī jaise

reshmī dhuup kī adā ho tum

shaam ho jaise jugnuoñ se bharī

yā shab-e-vasl kī sadā ho tum

āsmāñ hai yā tumhārā āñchal

ye ghaTā hai yā tumhārā kājal

adh-jagī raat meñ bārish jaise

chhanchhanātī hai tumhārī paa.el

ye sabā hai yā terī ḳhushbū hai

ye nasha hai yā terā jaadū hai

hai tirā husn zindagī merī

hai tirā 'ishq bandagī merī

tujh se ye kā.enāt raushan hai

tujh se merī hayāt raushan hai

maiñ jo dil huuñ tū merī dhaḌkan hai

tū mirā zarf tū mirā fan hai

merī sāñsoñ meñ justujū terī

merī āñkhoñ meñ aarzū terī

tū mirī chāhatoñ kā manzar hai

maiñ huuñ sahrā to tū samundar hai

maiñ ḳhvāb huuñ tū rang hai shāyad

tū mere sang sang hai shāyad

muskuraati hui faza ho tum

muskuraati hui faza ho tum

gungunati hui hawa ho tum

sard lamhon mein ghul rahi jaise

reshmi dhup ki ada ho tum

sham ho jaise jugnuon se bhari

ya shab-e-wasl ki sada ho tum

aasman hai ya tumhaara aanchal

ye ghaTa hai ya tumhaara kajal

adh-jagi raat mein barish jaise

chhanchhanati hai tumhaari pael

ye saba hai ya teri KHushbu hai

ye nasha hai ya tera jadu hai

hai tera husn zindagi meri

hai tera 'ishq bandagi meri

tujh se ye kaenat raushan hai

tujh se meri hayat raushan hai

main jo dil hun tu meri dhaDkan hai

tu mera zarf tu mera fan hai

meri sanson mein justuju teri

meri aankhon mein aarzu teri

tu meri chahaton ka manzar hai

main hun sahra to tu samundar hai

main KHwab hun tu rang hai shayad

tu mere sang sang hai shayad