na jaane kya ho

baat niklegī to phir duur talak jā.egī

log be-vajah udāsī kā sabab pūchheñge

ye bhī pochheñge ki tum itnī pareshāñ kyuuñ ho

uñgliyāñ uTTheñgī sūkhe hue bāloñ kī taraf

ik nazar dekheñge guzre hue sāloñ kī taraf

chūḌiyoñ par bhī ka.ī tanz kiye jā.eñge

kāñpte hāthoñ pe fiqre bhī kase jā.eñge

log zālim haiñ har ik baat kā ta.ana deñge

bātoñ bātoñ meñ mirā zikr bhī le ā.eñge

un kī bātoñ kā zarā sā bhī asar mat lenā

varna chehre ke ta.assur se samajh jā.eñge

chāhe kuchh bhī ho savālāt na karnā un se

mere baare meñ koī baat na karnā un se

baat niklegī to phir duur talak jā.egī

baat niklegi to phir dur talak jaegi

log be-wajah udasi ka sabab puchhenge

ye bhi pochhenge ki tum itni pareshan kyun ho

ungliyan uTThengi sukhe hue baalon ki taraf

ek nazar dekhenge guzre hue salon ki taraf

chuDiyon par bhi kai tanz kiye jaenge

kanpte hathon pe fiqre bhi kase jaenge

log zalim hain har ek baat ka tana denge

baaton baaton mein mera zikr bhi le aaenge

un ki baaton ka zara sa bhi asar mat lena

warna chehre ke tassur se samajh jaenge

chahe kuchh bhi ho sawalat na karna un se

mere bare mein koi baat na karna un se

baat niklegi to phir dur talak jaegi