na marne ka dukh

koī mere larazte haath meñ

kāġhaz kā purza aur qalam pakḌā rahā thā

kabhī kuchh zer-e-lab hī baḌbaḌā kar

koī isbāt meñ

āñkhoñ kī aur māthe kī jumbish chāhtā thā

kabhī dāñtoñ meñ hoñToñ ko dabā kar

koī rone kī koshish kar rahā thā

koī to chand lamhoñ ba.ad apne

baal bikhrāne garebāñ nochne kī fikr meñ thā

koī ġhamgīñ chehra aur siyāh malbūs meñ

behad hasīñ ma.alūm detā thā

mere ajdād ke nāmoñ ko gañvā kar

koī mujh se ta.alluq joḌtā thā

sabhī nazdīk the mere

udhar bhaa.ī bhatīje the

udhar bahneñ thiiñ bhānje the

phir un ke ba.ad

rishte joḌne vaale saf-ārā the

ye lagtā thā ki kuchh hī der meñ

mātam bapā hogā

maiñ un bātoñ se

bistar par paḌā

āñkhoñ ko thoḌī sī khulī rakh kar

baḌe dilchasp muuD meñ thā

sabhī ġhamgīn the lekin

tamannā.eñ thiiñ āñkhoñ meñ

yakāyak maiñ ne karvaT lī

aur āñkheñ khol kar uThne kī koshish kī

to dekhā

sabhī ke lab pe masnūī hañsī thī

chamak āñkhoñ se ġhā.eb thī

koi mere larazte hath mein

kaghaz ka purza aur qalam pakDa raha tha

kabhi kuchh zer-e-lab hi baDbaDa kar

koi isbaat mein

aankhon ki aur mathe ki jumbish chahta tha

kabhi danton mein honTon ko daba kar

koi rone ki koshish kar raha tha

koi to chand lamhon baad apne

baal bikhrane gareban nochne ki fikr mein tha

koi ghamgin chehra aur siyah malbus mein

behad hasin malum deta tha

mere ajdad ke namon ko ganwa kar

koi mujh se talluq joDta tha

sabhi nazdik the mere

udhar bhai bhatije the

udhar bahnen thin bhanje the

phir un ke baad

rishte joDne wale saf-ara the

ye lagta tha ki kuchh hi der mein

matam bapa hoga

main un baaton se

bistar par paDa

aankhon ko thoDi si khuli rakh kar

baDe dilchasp muD mein tha

sabhi ghamgin the lekin

tamannaen thin aankhon mein

yakayak main ne karwaT li

aur aankhen khol kar uThne ki koshish ki

to dekha

sabhi ke lab pe masnui hansi thi

chamak aankhon se ghaeb thi