na-umidi kufr hai

tum jo maġhrib kī jugālī se kabhī thakte nahīñ

tum ko kyā ma.alūm hai taḳhlīq kā jauhar kahāñ

falsafī bante ho apne aap se pūchho kabhī

kho gayā hai ruuh kā gauhar kahāñ

tum dil-o-jāñ se mashriq kī parastārī karo

kyā barahman ke sivā kuchh aur ho

kyā kisī kī mashriq-o-maġhrib meñ dildārī huī

bhuuk se behāl haiñ jo un kī ġham-ḳhvārī huī

adl kī mīzān jab TuuTī paḌī ho darmiyāñ

zindagī saarī kī saarī hī riyā-kārī huī

maġhrib-o-mashriq kī saarī bahs meñ tum nā-umīdī ke sivā kyā de sake

nā-umīdī kufr hai

kufr se bachte bhī aur kufr hī karte ho tum

tum to maazī haal o mustaqbil ke bhī qaa.il nahīñ

dil kahe kuchh bhī magar tum is taraf maa.il nahīñ

vo jo mutlaq hai tumhāre vāste saare zamāne de gayā

tum batāo tum ne ab tak kyā kiyā

nā-umīdī kufr hai kufr hī karte ho tum

dil meñ gar raushan ho us din kī ummīd

justujū tum ko jab apne aap se milvā.egī

zindagī karne ko pyāre shash-jihat khul jā.egī

tum jo maghrib ki jugali se kabhi thakte nahin

tum ko kya malum hai taKHliq ka jauhar kahan

falsafi bante ho apne aap se puchho kabhi

kho gaya hai ruh ka gauhar kahan

tum dil-o-jaan se mashriq ki parastari karo

kya barahman ke siwa kuchh aur ho

kya kisi ki mashriq-o-maghrib mein dildari hui

bhuk se behaal hain jo un ki gham-KHwari hui

adl ki mizan jab TuTi paDi ho darmiyan

zindagi sari ki sari hi riya-kari hui

maghrib-o-mashriq ki sari bahs mein tum na-umidi ke siwa kya de sake

na-umidi kufr hai

kufr se bachte bhi aur kufr hi karte ho tum

tum to mazi haal o mustaqbil ke bhi qail nahin

dil kahe kuchh bhi magar tum is taraf mail nahin

wo jo mutlaq hai tumhaare waste sare zamane de gaya

tum batao tum ne ab tak kya kiya

na-umidi kufr hai kufr hi karte ho tum

dil mein gar raushan ho us din ki ummid

justuju tum ko jab apne aap se milwaegi

zindagi karne ko pyare shash-jihat khul jaegi