napoleon ke mazar par

kitnī raushan kyuuñ na ho 'āzād' āḳhir ek din

sham-e-hastī maut ke jhoñkoñ se gul ho jā.egī

jaise gahvāre meñ so jaatā hai tifl-e-shīr-ḳhvār

ziist āġhosh-e-ajal meñ is tarah so jā.egī

maah o aḳhtar haiñ ḳhajil jis se vo chiñgārī zarūr

ik na ik din ālam-e-zulmāt meñ kho jā.egī

lekin is zulmat-kade meñ ek nuur aisā bhī hai

gardish-e-ayyām jis ke paas aa saktī nahīñ

ek aisā bhī hai lauh-e-vaqt par naqsh-e-davām

koī shai bhī jis ko aalam se miTā saktī nahīñ

maut jhoñke le ke uTThe yā bagūle le ke aa.e

azmat-e-kirdār kā sho.ala bujhā saktī nahīñ

kitni raushan kyun na ho 'azad' aaKHir ek din

sham-e-hasti maut ke jhonkon se gul ho jaegi

jaise gahware mein so jata hai tifl-e-shir-KHwar

zist aaghosh-e-ajal mein is tarah so jaegi

mah o aKHtar hain KHajil jis se wo chingari zarur

ek na ek din aalam-e-zulmat mein kho jaegi

lekin is zulmat-kade mein ek nur aisa bhi hai

gardish-e-ayyam jis ke pas aa sakti nahin

ek aisa bhi hai lauh-e-waqt par naqsh-e-dawam

koi shai bhi jis ko aalam se miTa sakti nahin

maut jhonke le ke uTThe ya bagule le ke aae

azmat-e-kirdar ka shoala bujha sakti nahin