نقش محبت

وہ پردہ روئے پر انوار سے اٹھا نہ سکے

ہم اپنے سوئے ہوئے بخت کو جگا نہ سکے

تڑپ تڑپ کے تو بسمل نے جان تک دے دی

وہ آب تیغ کے دو گھونٹ بھی پلا نہ سکے

ہماری ان کی محبت رہی اسی صورت

ادھر بڑھا نہ سکے ہم ادھر گھٹا نہ سکے

ہزار ولولے موجود تھے طبیعت میں

مگر جب ان سے ملی آنکھ بھی ملا نہ سکے

نظر ملاتے ہی ساقی نے کر دیا بے خود

پلائی ایسی کہ پھر ہوش میں ہم آ نہ سکے

نہ پوچھ قصۂ بے چارگیٔ عشق نہ پوچھ

یہ راز وہ ہے کسی کو جو ہم بتا نہ سکے

جناب نورؔ ہمیں تو مٹا دیا لیکن

ہمارے نقش محبت کو وہ مٹا نہ سکے