naya ahd-nama

barsoñ se ye bām-o-dar ki jin par

mahkī huī sub.h ke haiñ bose

yādoñ ke yahī nagar ki jin par

sajte haiñ ye shaam ke dhundalke

ye moḌ ye rahguzar ki jin par

lagte haiñ udāsiyoñ ke mele

haiñ mere aziiz mere sāthī

kab se mirā aasrā rahe haiñ

sunte haiñ ye mere dil kī dhaḌkan

jaise ye mujhe sikhā rahe haiñ

hañs-bol ke umr kaaT denā

mere yahī dast-o-pā rahe haiñ

barsoñ se ye merī zindagī haiñ

barsoñ se maiñ in ko jāntā huuñ

haiñ merī vafā pe ye bhī nāzāñ

har baat maiñ in kī māntā huuñ

lekin mire dil ko kyā huā hai

maiñ aaj kuchh aur Thāntā huuñ

lagtā hai ye shahr-e-dil-barāñ bhī

hai paañv kī mere koī zanjīr

bas ek hī raat ek din hai

har roz vahī purānī tasvīr

har sub.h vahī purāne chehre

ho jaate haiñ shaam ko jo dil-gīr

ab aur kahīñ se chal ke dekheñ

kis tarah sahar kī narm kaliyāñ

kirnoñ kā salām le rahī haiñ

jaag uThtī haiñ kis tarah se galiyāñ

sab kaam pe aise jā rahe haiñ

jaise ki manā.eñ rañg-raliyāñ

dekheñ kahīñ shaam ko nikal kar

Dhalte hue ajnabī se saa.e

yuuñ haath meñ haath le rahe hoñ

jaise kahīñ ghaas sarsarā.e

is tarah se paañv chal rahe hoñ

jaise ka.ī pī ke laḌkhaḌā.e

aane hī ko hoñ milan kī ghaḌiyāñ

sūraj kahīñ ġham kā Dūbtā ho

mahkī ho kahīñ pe shab kī dulhan

kachnār kahīñ pe khil rahā ho

har gaam pe ik nayā ho aalam

har moḌ pe ik nayā ḳhudā ho

barson se ye baam-o-dar ki jin par

mahki hui subh ke hain bose

yaadon ke yahi nagar ki jin par

sajte hain ye sham ke dhundalke

ye moD ye rahguzar ki jin par

lagte hain udasiyon ke mele

hain mere aziz mere sathi

kab se mera aasra rahe hain

sunte hain ye mere dil ki dhaDkan

jaise ye mujhe sikha rahe hain

hans-bol ke umr kaT dena

mere yahi dast-o-pa rahe hain

barson se ye meri zindagi hain

barson se main in ko jaanta hun

hain meri wafa pe ye bhi nazan

har baat main in ki manta hun

lekin mere dil ko kya hua hai

main aaj kuchh aur Thanta hun

lagta hai ye shahr-e-dil-baran bhi

hai panw ki mere koi zanjir

bas ek hi raat ek din hai

har roz wahi purani taswir

har subh wahi purane chehre

ho jate hain sham ko jo dil-gir

ab aur kahin se chal ke dekhen

kis tarah sahar ki narm kaliyan

kirnon ka salam le rahi hain

jag uThti hain kis tarah se galiyan

sab kaam pe aise ja rahe hain

jaise ki manaen rang-raliyan

dekhen kahin sham ko nikal kar

Dhalte hue ajnabi se sae

yun hath mein hath le rahe hon

jaise kahin ghas sarsarae

is tarah se panw chal rahe hon

jaise kai pi ke laDkhaDae

aane hi ko hon milan ki ghaDiyan

suraj kahin gham ka Dubta ho

mahki ho kahin pe shab ki dulhan

kachnar kahin pe khil raha ho

har gam pe ek naya ho aalam

har moD pe ek naya KHuda ho