naya sal

āsmān ke sab kivāḌe khol do

aur is bujhī-bujhī dhartī ko

kā.enātī kirnoñ kī

sīmābī raushniyoñ se nahlā do

kāmnāoñ ke sunahre tāroñ se jagmagātā

laal joḌā ise pahnāo

ḳhushiyoñ kī sandal se maañg bharo

aur māthe par

ummīd kī

jhilmilātī Tiklī lagā kar

be-qarār tamannāoñ kī chulbulī

sharīr uñgliyoñ se

use itnā gudgudāo

ki vo khilkhilā kar hañs paḌe

hamārā anā-o-akelā-pan

TūTne vaalā hai

ham ne zohra kī peshānī chuum lī hai

aur chāñd ke gale meñ bāheñ Daal dī haiñ

mirrīḳh ke burjoñ se

ab jangī naqqāroñ kī nahīñ

pyaar aur mohabbat

aman aur masarrat kī

surīlī shahnā.iyāñ

sunā.ī dene lagī haiñ

insān kī barāt

baḌe dhuum se

nikalne vaalī hai

aasman ke sab kiwaDe khol do

aur is bujhi-bujhi dharti ko

kaenati kirnon ki

simabi raushniyon se nahla do

kaamnaon ke sunahre taron se jagmagata

lal joDa ise pahnao

KHushiyon ki sandal se mang bharo

aur mathe par

ummid ki

jhilmilati Tikli laga kar

be-qarar tamannaon ki chulbuli

sharir ungliyon se

use itna gudgudao

ki wo khilkhila kar hans paDe

hamara ana-o-akela-pan

TuTne wala hai

hum ne zohra ki peshani chum li hai

aur chand ke gale mein bahen Dal di hain

mirriKH ke burjon se

ab jangi naqqaron ki nahin

pyar aur mohabbat

aman aur masarrat ki

surili shahnaiyan

sunai dene lagi hain

insan ki baraat

baDe dhum se

nikalne wali hai