nazm apnon ki talash

us ne jab pahlā hamla kiyā

to maiñ chup rahā

kyūñki maiñ mahfūz thā

us ne jab dūsrā hamla kiyā

tau maiñ thoḌā sā sochne lagā lekin chup rahā

kyūñki maiñ mahfūz thā

phir merī ḳhud-ġharzī ne mujhe be his kar diyā

vo lagātār hamla kartā rahā aur

maiñ lagātār ḳhud ko mahfūz samajh kar chup rahā

na sirf chup rahā balki

hamesha apne hī logoñ ko

jazbātī aur be-sabr kahtā rahā

magar

ab jabki merī ḳhud-sāḳhta soch ke saath saath

merī gardan bhī apnī marzī se hil nahīñ saktī hai

to merā zamīr bār-bār kos rahā hai

ki tū na ab apnoñ kā rahā na ġhairoñ kā

kyūñki tū apnoñ kī ḳhūbiyoñ ko nazar-andāz kartā rahā

aur ġhairoñ kī ḳhāmiyoñ ko bahāna-bāzī se pasand kartā rahā

ab merā vajūd gum ho chukā hai

kyūñki

maiñ apnoñ se duur ho kar sarāb ke chashmoñ meñ

apnoñ kī sūrateñ talāsh kar rahā huuñ

us ne jab pahla hamla kiya

to main chup raha

kyunki main mahfuz tha

us ne jab dusra hamla kiya

tau main thoDa sa sochne laga lekin chup raha

kyunki main mahfuz tha

phir meri KHud-gharzi ne mujhe be his kar diya

wo lagatar hamla karta raha aur

main lagatar KHud ko mahfuz samajh kar chup raha

na sirf chup raha balki

hamesha apne hi logon ko

jazbaati aur be-sabr kahta raha

magar

ab jabki meri KHud-saKHta soch ke sath sath

meri gardan bhi apni marzi se hil nahin sakti hai

to mera zamir bar-bar kos raha hai

ki tu na ab apnon ka raha na ghairon ka

kyunki tu apnon ki KHubiyon ko nazar-andaz karta raha

aur ghairon ki KHamiyon ko bahana-bazi se pasand karta raha

ab mera wajud gum ho chuka hai

kyunki

main apnon se dur ho kar sarab ke chashmon mein

apnon ki suraten talash kar raha hun