nazm

na tum rahoge na ham raheñge

hamāre naqsh-e-qadam raheñge

hamārī nekī kī lau rahegī

hamāre dāġh-e-sitam raheñge

raheñge kab tak yuuñ sar-nigūñ ham

kahāñ talak ye sanam raheñge

ye jāh-o-'azmat ke jhūTe paikar

kahāñ talak mohtaram raheñge

yazīdiyat kā chalan vahī hai

jhukeñge sar yā qalam raheñge

'alam jo haq kā uThā.e hoñge

vo har zamāne meñ kam raheñge

uThā.e palkoñ pe ghūmnā hai

zamīñ pe vo kal-‘adam raheñge

'ajīb fitrat hai haq-navā kī

dabeñge aur tāza-dam raheñge

jo haar baiThegī zabt-e-ḳhilqat

'sabā' kahāñ phir bharam raheñge

na tum rahoge na hum rahenge

hamare naqsh-e-qadam rahenge

hamari neki ki lau rahegi

hamare dagh-e-sitam rahenge

rahenge kab tak yun sar-nigun hum

kahan talak ye sanam rahenge

ye jah-o-'azmat ke jhuTe paikar

kahan talak mohtaram rahenge

yazidiyat ka chalan wahi hai

jhukenge sar ya qalam rahenge

'alam jo haq ka uThae honge

wo har zamane mein kam rahenge

uThae palkon pe ghumna hai

zamin pe wo kal-‘adam rahenge

'ajib fitrat hai haq-nawa ki

dabenge aur taza-dam rahenge

jo haar baiThegi zabt-e-KHilqat

'saba' kahan phir bharam rahenge