nazm

raat añdherī thī sunsān thī aur maiñ

tang-o-tārīk galiyoñ se hotā huā

ajnabī se ḳhayāloñ meñ khoyā huā

ek aise nagar jā ke pahuñchā jahāñ

sarsarāte daraḳhtoñ ne phunkārtī vahshatoñ ne mirā ḳhair-maqdam kiyā

chand lamhe ḳhamoshī meñ guzre magar

phir achānak kahīñ se koī naġhma-e-ġham sunā.ī diyā

merī nazreñ sadā ke ta'āqub meñ pahuñchīñ bahut duur tak

aur girtā sañbhaltā muġhannī talak maiñ pahuñch hī gayā

paas hī us ke thī ek qindīl jaltī huī

ḳhaak ke ek tuude pe chādar shagufta se phūloñ kī thī

aur bhī an-ginat ḳhaak ke Dher the

maiñ ki kuchh bolnā chāhtā thā magar

us ne merī taraf kuchh tavajjoh na kī

jaane kyā baat thī

phir sahar ho ga.ī

aur maiñ ek goshe meñ gum-sum yahī sochtā rah gayā

kis qadar jāñ-fazā hai yahāñ kī fazā

kyoñ na har roz aatā rahūñ maiñ yahāñ

ek din is nagar meñ hamesha hamesha ko aanā hī hai

raat andheri thi sunsan thi aur main

tang-o-tarik galiyon se hota hua

ajnabi se KHayalon mein khoya hua

ek aise nagar ja ke pahuncha jahan

sarsaraate daraKHton ne phunkarti wahshaton ne mera KHair-maqdam kiya

chand lamhe KHamoshi mein guzre magar

phir achanak kahin se koi naghma-e-gham sunai diya

meri nazren sada ke ta'aqub mein pahunchin bahut dur tak

aur girta sanbhalta mughanni talak main pahunch hi gaya

pas hi us ke thi ek qindil jalti hui

KHak ke ek tude pe chadar shagufta se phulon ki thi

aur bhi an-ginat KHak ke Dher the

main ki kuchh bolna chahta tha magar

us ne meri taraf kuchh tawajjoh na ki

jaane kya baat thi

phir sahar ho gai

aur main ek goshe mein gum-sum yahi sochta rah gaya

kis qadar jaan-faza hai yahan ki faza

kyon na har roz aata rahun main yahan

ek din is nagar mein hamesha hamesha ko aana hi hai