nazm

tumheñ mā'lūm hai

maiñ ne to 'arz-e-hāl meñ

pahle se likkhā thā

hamesha tum safar karnā

aur ik tum ho ki merī ik zarā sī baat par

nārāz ho ab tak

kahāñ ho tum

kahāñ hai raushnī jis se mirā chehra munavvar thā

kahāñ hai shaam jo muddat se merī dastaras meñ thī

kahāñ haiñ dhuul meñ lipTe

mahakte dhuup ke vo ḳhushnumā paañv

jo anjāne safar meñ

jab mirī dahlīz ko chhūte

to maiñ fart-e-masarrat se

nadī ke aa.ine meñ ek dekhe 'aks ko hī

āsmāñ kā devtā kahtā

kahāñ hai rāh-e-bastī kā vo naqqārā

vo ik āvāz vo ik jal-tarang

jo dil se Takrā kar

havā ko zindagī dete hue phūloñ ko chhū kar

chāhne vāloñ ko ye paiġhām detī thī

mohabbat kā ye hāsil hai

hamesha tum safar karnā

aur ik aisā safar karnā

na jis kī samt ho koī

na koī raah tā-manzil

tumheñ mā'lūm hai

maiñ ne to 'arz-e-hāl meñ

pahle se likkhā thā

magar tum to havā aur kohr ke aivān meñ nārāz baiThe ho

palaT aao ki jīvan kī añdherī raat kā tanhā safar

kaaTe nahīñ kaTtā

tumhein ma'lum hai

main ne to 'arz-e-haal mein

pahle se likkha tha

hamesha tum safar karna

aur ek tum ho ki meri ek zara si baat par

naraaz ho ab tak

kahan ho tum

kahan hai raushni jis se mera chehra munawwar tha

kahan hai sham jo muddat se meri dastaras mein thi

kahan hain dhul mein lipTe

mahakte dhup ke wo KHushnuma panw

jo anjaane safar mein

jab meri dahliz ko chhute

to main fart-e-masarrat se

nadi ke aaine mein ek dekhe 'aks ko hi

aasman ka dewta kahta

kahan hai rah-e-basti ka wo naqqara

wo ek aawaz wo ek jal-tarang

jo dil se Takra kar

hawa ko zindagi dete hue phulon ko chhu kar

chahne walon ko ye paigham deti thi

mohabbat ka ye hasil hai

hamesha tum safar karna

aur ek aisa safar karna

na jis ki samt ho koi

na koi rah ta-manzil

tumhein ma'lum hai

main ne to 'arz-e-haal mein

pahle se likkha tha

magar tum to hawa aur kohr ke aiwan mein naraaz baiThe ho

palaT aao ki jiwan ki andheri raat ka tanha safar

kaTe nahin kaTta