Nietzsche ne kaha

vo sab parinde jo uḌ ke jaate haiñ fāsloñ meñ

kahīñ bahut duur fāsloñ meñ

so un ke baare meñ ye to sab jānte haiñ, āḳhir kahīñ koī ek yā

dūsrī jagah aisī aa hī jaatī hai, vo jahāñ thak ke baiTh jaa.eñ

vo koī mastūl yā koī banjar chaTTān hotī hai jis ko pā kar vo sochte haiñ

ki ye bhī kuchh kam nahīñ bahut hai,

magar bhalā kaun is haqīqat ko jaan kar ye gumāñ karegā ki un se aage

vahāñ kushāda fazā nahīñ, yā vo ek aisā maqām hai, jis se aage

parvāz kā kisī tarah koī imkān hī nahīñ hai

hamāre saare aziim ustād aur sab pesh-rau bhī āḳhir kahīñ pahuñch kar

Thahar ga.e the

so aisā hī mere saath hogā

so aisā hī tere saath hogā

na.e parinde to aage hī jā.eñge

magar haañ

yahī basīrat yahī yaqīñ ham meñ aur un meñ muqāble kā sabab hai

jo ham se aur hamārī salāhiyat se buland ho kar fazā kī vus.at meñ dekhtā hai

ki kuchh parinde haiñ ham se baḌh kar javāñ tavānā

aur un tavānā javāñ parindoñ ke ġhol koshāñ haiñ aaj bhī us jagah

jahāñ par ham apnī saarī salāhiyat aazmā chuke haiñ

jahāñ har ik chiiz hai samundar

jahāñ har ik chiiz hai samundar

ham ab kahāñ jaa.eñ

ye samundar

batāo kyā ham ise kabhī paar kar sakeñge

ye aarzū ab kahāñ hameñ le ke jā rahī hai

usī taraf kyuuñ

ki jis taraf jaane vaale insāniyat ke sabab jagmagāte ḳhurshīd

chhup ga.e haiñ

kabhī hamāre liye bhī shāyad yahī kahā jā.egā kisī din

ki ham ne maġhrib kī samt gahre samundaroñ meñ safar kiyā thā

umiid ye thī ki ham ko mashriq meñ ik na.ī sarzamīñ milegī

magar muqaddar ye thā ki ai dost

be-karānī se jā ke Takrā.eñ aur ham paash paash ho jaa.eñ

yā mire dost shāyad.....

wo sab parinde jo uD ke jate hain faslon mein

kahin bahut dur faslon mein

so un ke bare mein ye to sab jaante hain, aaKHir kahin koi ek ya

dusri jagah aisi aa hi jati hai, wo jahan thak ke baiTh jaen

wo koi mastul ya koi banjar chaTTan hoti hai jis ko pa kar wo sochte hain

ki ye bhi kuchh kam nahin bahut hai,

magar bhala kaun is haqiqat ko jaan kar ye guman karega ki un se aage

wahan kushada faza nahin, ya wo ek aisa maqam hai, jis se aage

parwaz ka kisi tarah koi imkan hi nahin hai

hamare sare azim ustad aur sab pesh-rau bhi aaKHir kahin pahunch kar

Thahar gae the

so aisa hi mere sath hoga

so aisa hi tere sath hoga

nae parinde to aage hi jaenge

magar han

yahi basirat yahi yaqin hum mein aur un mein muqable ka sabab hai

jo hum se aur hamari salahiyat se buland ho kar faza ki wusat mein dekhta hai

ki kuchh parinde hain hum se baDh kar jawan tawana

aur un tawana jawan parindon ke ghol koshan hain aaj bhi us jagah

jahan par hum apni sari salahiyat aazma chuke hain

jahan har ek chiz hai samundar

jahan har ek chiz hai samundar

hum ab kahan jaen

ye samundar

batao kya hum ise kabhi par kar sakenge

ye aarzu ab kahan hamein le ke ja rahi hai

usi taraf kyun

ki jis taraf jaane wale insaniyat ke sabab jagmagate KHurshid

chhup gae hain

kabhi hamare liye bhi shayad yahi kaha jaega kisi din

ki hum ne maghrib ki samt gahre samundaron mein safar kiya tha

umid ye thi ki hum ko mashriq mein ek nai sarzamin milegi

magar muqaddar ye tha ki ai dost

be-karani se ja ke Takraen aur hum pash pash ho jaen

ya mere dost shayad